مغامرات بنت تسري تالي اليل !!

مغامرات بنت تسري تالي الليل ! || تمت
دخلت هند على امها وهي جالسه تتابع اخبار سوريا ولسانها يلهث بالدعاء لهم وعلى بشار الكلب
هند تقاطع مناجاة الام لربها يمه يمه يمااااه
والام مع كل كلمه تصدر من هند تأشر براسها يعني فارقي بدعي ماني فاضيه لك قاطعتها هند مره مرتين الثالثه الريموت يرتطم بوجه هند
اح يماااه عورتيني
تستاهلين ماتشوفيني لاهيه وش تبين تقاطعيني وانا ادعي على كلب البعث بشار انتي ماتشوفيه حشر المسلمين
الله ياجعل حشرته في المجاري اللي كان فيها القذافي عاجله غير آجله قولي امين
امين امين بس خليني من بشار يمه تكفين انا طفشانه ابي اطلع شوفي واحد من العيال يطلعنا اي مكان قسم ضايقه فيني الوسيعه
جييعلها تضيق الوسيعه على بشار ومايلقى له حتى جحر ينخش فيه قولي امين
ياليلي ليلاه يا يمه تكفين انا اكلمك ابي اطلع وتكلميني عن بشار الزفت حسي فيني يماااه
وين تطلعين جعلها تطلع روح بشار عسره اخوانك كلاب كنهم بشار الواحد من اكلمه يقعد يتصدد كنه شايف له منكر ويقول مواعد رياجيل عندنا شغل مهم
وهذاني لي اسبوع ابي السوق بروح اجيب لي شوية غريضات ناقصه البيت وماحد وداني استرحمي ربك وروحي صلي ركعتين لله وادعي على بشار ان الله ياخذه ويفك المسلمين من شره

ياسبحان الله يايمه لك ساعتين مقابله التلفزيون وبس تدعين ما شفتك قمتي تصلين ركعتين وانا على طول قلتي لي روحي صلي ركعتين تصرفيني يعني ؟

اقول ورا ماتفارقيني قبل يجيك التلفزيون بكبره على راسك انتي طايلن لسانك والله اعلم انك بالمستقبل بتعقيني يالعاقه

خرجت هند من امها وهي تنافخ وتتمتم بكلمات تشابه كلمات الشغالات في حالة التحلطم
دخلت هند لغرفتها وهي متضايقه جدا ومسكت حظها في زاويه وماخلت كلمه خايسه الا قالتها لهذا الحظ الضعيف
امحق حظ علي وامحق اهل مايقدرون النفسيات ياربي انا ليه عايشه بينهم ليه ماطلعت بنت ناس ثانين متحررين وماعندهم عقد
طلعه بس بطلع والله ماطلبت شي محرم بشم هوا بشوف ناس غير اهلي انا عايشه بسجن ولا وشو ياربي وش هالحظ المعفن الي علي
وبينما هند مستمره في وصلة الردح على حظها دخلت عليها الشغاله تقول ماما تحت تقولك قولي امين لانها جالسه تسوي دعاء على بشار
وبسرعة البرق تمسك هند الابجوره وتحذفها على الشغاله وهي تصرخ لكن الشغاله تفادت الضربه وصكت الباب قبل يجيها شي
وبعد ثانيتين تفتح الشغاله الباب وهي تضحك وماما تقولك بعد لاتنسين الركعتين
صفقت الباب بسرعه وانحاشت تحت قبل تقتلها هند
الطفش والحلطمه والضيقه والنعاس غلب هند وخذت لها نومه طويله وماصحت الا على صوت طنطنت الـ بي بي
شافت الساعه ولا هي 2 بعد منتصف الليل كانت برود كاستات سخيفه وسماجة بعض البنات
خذت ال بي بي معها وهي نازله كانت تسولف للبنات انها توها صاحيه وميته جوع ومتضايقه . نزلت ومالقت احد واعي من اهلها كلهم نايمين راحت للمطبخ تشوف لها شي تاكله
والمطبخ كان منفصل عن البيت الداخلي وهي رايحه صوبه سمعت صوت ضحك وقهقهه عاليه وكأنها لمة شباب والصوت قريب من البيت
اتبعت هند مصدر هذا الصوت لين وصلت عند نهاية حديقتهم وهي تقترب سمعت مجموعة شباب يتآمرون على واحد سكران !! وهم يضحكون عليه وعلى حالته الي شافوه فيها
وفهمت هند من كلامهم ان هذا السكران موجود حاليا وجالس بروحه بزاويه صاده بالحاره وماحوله احد وانه صيده سهله لهم وهم يبون يستهبلون عليه ويجننونه وجالسين يسوون مخططهم
وكان واحد يقول لهم انتو بتستهبلون بكيفكم بس انا ان لقيت معه فلوس ولا شراب باخذهم لي
ويقاطعه واحد من الشباب .
شف اذا تبي الشراب اخذه لكن الفلوس بنتناصفها كلنا
هند وهي تسمعهم طنطن عندها ال بي بي العيال يقولون لبعض من عنده ذالصوت ؟
كل واحد يقول مو عندي


اكتمت جوالها بسرعه وحطته صامت وارسلت لهن وهي تضحك تخيلو يابنات انا الحين جالسه اتصنت على سوالف شباب قريبين من سور حديقتنا وطنطن ال بي بي والشباب اسمعو الصوت وكل واحد يقول مهوب عندي
تحمست وحده من اللسته وقالت انا لو عندك الحين ياهند كان استهبل عليهم وارميهم بحجر ولا اقلد صوت مرعب واشوف وش يسوون
والثانيه تقول حاولي تويقين عليهم وتشوفينهم فيهم احد مزيون ولا كلهم شيون
ووحده تقول صوريهم مدي يدك من فوق السور وصوريهم لنا
هند . بس بس شكلهم عندهم ميول اجراميه خلوني انقل لكم كل شي يقولونه
كانو البنات يتابعون مع هند التطورات وهي تقول لهم كل الحوار الداير بين العيال
واحد من العيال قالهم شوفو انا بروح من ورا السكران وبجلس احذف عليه زبايل وتراب وحصى وكل شي هو اكيد بيجي يدور الي جالس يحذفه انتو بهذا الوقت دوركم تجون وتفتشون مكانه وتاخذون أي شي بينفعنا فلوس شراب دخان ساعه قلم أي شي أي شي فاهمين
خلاص اجل انت يامتعب تروح من وراه وانا ونايف وناصر الي بنفتش اما انت يا محمد خذ الجوال وصور
خلنا نطقطق عليه بعدين محمد وهو يضحك يقولهم تخيلو ياعيال لو معنا العاب ناريه بعد مانخذ الغنائم نشبها عليه والله ياهو بيطلع مقطع مضحك جدا وننزله باليوتيوب ويصير لنا معجبين ونسويلنا قناة وبعدين نقعد ننزل مقاطع نسوي اننا خايفين عالمجتمع وننصح وننتقد اللله ياعيال والله فكره
قام متعب وهو ينظر لمحمد نظرات ازدراء اقول يامحمد ماكنك تحمست زياده وشطحت المهم انا بروح اجمع لي كم شي علشان احذف فيه السكران لاتروحون انتظروني هنا دقيقه وجايكم
يالله عجل علينا منتظرينك .

هند بهالوقت ترسل ياحسافه يابنات بيروحون بعد شوي وانا ودي اشوف وش بيسون بالسكران
قهر بعرف وش يسوون
كل البنات يتحسرون معها ودهم يعرفون نهاية سالفة الشباب مع السكران
وحده منهم قالت لها صحي الشغاله وعطيها الجوال تروح تتبعهم وتصورهم واغريها انك بتعطينها فلوس واجد
تحمسن البنات للفكره و يحايلون هند تنفذ طلبهم
بس يبدو ان هند عندها رأي ثاني وولعت براسها فكره مجنونه قالت لهم انا برب سريع
شغلت تسجيل الصوت بالجوال وتركته في مكانها علشان يسجل حديث العيال في غيابها وراحت تركض متجهه لغرفة الغسيل وبحثت بين الملابس وخذت ثوب وشماغ من ثياب اخوانها
ورجعت للزاويه وهي تلبس الثوب والشماغ وتتلطم فيه لكن صوت الشباب اختفى ومعادهم موجودين بمكانهم خذت جوالها وشغلت التسجيل
تبي تسمع وش قالو او وين بيروحون وكان الصوت مو واضح كثير بس الي عرفته انهم مايمديهم يروحون بعيد
ارسلت يابنات ترقبوا بعد شوي فديو كامل لكل الاحداث برب ولا ترسلون شي عشان ماتقلقوني وبعدين بعلمكم بكل شي
شغلت الكام حق الجوال
وطلعت من بابهم الخلفي بشويش بعد ما تأكدت ان الشارع فاضي ومحد يشوفها وهي طالعه كان المكان مظلم وصمت مخيف راحت للزاويه الي كانو فيها الشباب وهي تصور وتعلق عالفديو وكأنها تصور فلم وثائقي
شوفو اعزائي المشاهدين هذا هو مكان التخطيط للإستيلاء على املاك السكران وشوفو هنا زقاره للحين ماطفت يعني لو هالزقاره تجيها هبة هواء وجنبها شي قابل للاشتعال كان احترق بيتنا بسبب استهتار هؤلاء الشباب لكن لن يفلتوا من العقاب تضحك هند وهي تقول هذا التعليق
وانفاسها وصوت خطواتها وضحكتها المكتومه مع منظر الحاره بهذا الوقت المتأخر من الليل كان مرعب شويتين هند تقول انا متحمسه وخايفه بس الاكيد اني ماراح اندم على هالتجربه انا طول اليوم متضايقه ومحد معبرني خلوني اعبر نفسي 
انا مادري هم وين راحو ولاني سامعه صوتهم وماعرف من وين ابتدي
بس بستمر بالبحث عنهم وماعتقد انهم ابتعدو كثير واثناء ماهند تكلم الكاميرا و تتجول بين الأزقه والممرات الضيقه تبحث عن الشباب والسكران
والا تسمع صوت واحد يلعن ويسب ويقول من الي جالس يحذفني بالطوب واللهي لا اذبحه دحين مييين الكلب هادا اي اح ازا انتا رجال اطلعلي لاتستخبا زي الحورمه

هند : هذا اكيد صوتهم تسرع بخطواتها والكاميرا تهتز وتقول لا لا هذا اكيد صوت السكران يمكنهم بدو الهجوم عليه انا لازم اركض الحين علشان ألحق عليهم واشوف وش يسون فيه صوت ضحكتها ورجليها وهي تركض والكاميرا تهتز والممر ضيق والمكان مظلم يادوبك فيه اضائة لمبه هنا ولمبه هناك وكل ماله والصوت اقرب اقرب اقرب وفجأه تصدم
في برميل للزباله وتتكرفس عالارض صوت طيحتها أليم ومشهد ارتطام الكاميرا بالارض واضح ومتسجل وصوتها وهي تصرخ وتقول آه كان عالي ويبدو متألمه حيل
وهي تحاول تتغلب على ألمها وتبي تقوم بسرعه قبل احد ينتبه لها وكان الجوال طايح بعيد عنها
وتوها قايمه وتمد يدها تاخذ الجوال من الارض ولا السكران واقف قدامها ويقول هذا انتا ياكلب واللهي لا اوريك ويكسر البطل الي معاه ويلحقها الجوال شغال والكاميرا شغاله صوت صراخ هند وهي تركض منحاشه منه وهو يلحقها ويقول والله لا اقطعك بهذا البطل صوته قريب منها وهي تحاول تكتم صرخاتها لاحد يحس فيها
من صوتها باين انها تبكي وتصرخ وفيه اصوات ثانيه غير صوتها هي والسكران
تسمع هند بعض الكلمات
امسكوه ياعيال امسكوه لايذبحه ويورطنا معه اصوات الشباب وهم ينادون السكران ويلفتون انتباهه لهم وهند ماتدري كم شخص يلحقها لأن الاصوات اكثر من واحد
تركض بأقصى سرعتها لمحت برميل زباله على جنب الممر عدت منه وسحبته بيدها وطيحته بعرض الممر
وثواني وتسمع صوت طيحه عنيفه التفت وراها وهي لازالت تركض شافت السكران طايح بالارض واثنين معاه وواحد يلحقها بأسرع ماعنده وياقربه منها ومابينه وبينها الا كم خطوه
هي شافته قريب منها صرخت يمااااااااه ومع الصرخه الا وهو طامر فوقها وطاح هو وياها عالارض
قام منها وتوه ماسكها بحلقها وبيعطيها بوكس على وجها وهو يقول انت وش تبي لاحقنا هاه ومن انت ؟ بهالوقت الشماغ طاح منها وهي تقول وخر عني ياحيوان وهي تبعد يديه عنها قبل يطقها البكس مسك يديها الثنتين وثبتها وموقادره تتحرك هو يكلمها وهو مصدوم انتي وش تبين لاحقتنا ؟
انا ماني مستوعب وش ذا يابنت تقاطعه الله يخليك الوضع مايسمح تستوعب ولا ماتسوتعب عطني شماغي اتلطم قبل يشوفوني ربعك ووخر عني بقوم بروح قبل يجون
عطني شماغي بسرعه تكفى
قام منها وهو مصدوم وعطاها الشماغ ووقفت وراه وهي تلبس الشماغ وتعدله عليها وتقول له تكفى انا بوجهك امانتك لاتخلي احد منهم يدري فيني وانا وراك تكفى ودني لأهلي او خلني اروح لبيتنا قبل يشوفوني ويلحقوني تكفى طلبتك
وين جوالي عطني جوالي شوفه جنبك طايح بسرعه جيبه
رد عليها وهو يحاول يخفيها وراه ومايخليها تبين للشباب وجوالها بيده الله يلعنك وش مطلعك من بيتكم في ذالحزه انتي ماوراك اهل ؟
وانتبه للجوال وهو بيده ولقى ان الكاميرا شغاله
الله يقلعك وبعد تصورين ! انتي من دازك علينا وش تبين لاحقتنا وليه تصورين انا بفهم وش قصتك انتي
يابن الناس انا ماصورتكم والله ماصورتكم كل شي صار بسرعه وعكس توقعاتي هات جوالي وبروح بيتنا تكفى
ماراح تشوفين جوالك لو تحبين السما انتي مصورتنا
والسكران لايصير فيه شي اتهمونا ان حنا السبب وانتي السبب في الي صاير له
بهاللحظه الشباب متجمعين على السكران وهو طايح وواحد منهم يقول ياعيال مشينا الرجال شكله مصاب واصابته بليغه شوفو دمه وشكثره
لابارك الله فيه من سكران مافي جيبه حتى ريال امشو خلصونا وبين انين وسب من السكران وهو عالارض بحاله يرثى لها باقي الشباب توجهو صوب الولد الي هند متخبيه وراه


هي بصوت كله رعب ورجفه ياويلي جايينا ان شافوني وش بيسوون فيني انا بنحاش منهم وانت امنتك تمنعهم مايلحقوني تكفى
.. الشباب من بعيد صوتهم يقاطع كلام هند مع الولد
هااه يامتعب وش يبي ذا وش عنده كان يلحقنا ؟
متعب يكلم هند بصوت خافت هششششش اسكتي وخليك متخبيه وراي لايحسون فيك قربو منهم وسألو متعب وين راح الرجال ووش يبي كان يلاحقنا ؟ لايكون من خويا السكران
متعب يجاوبهم وهو مرتبك وبيده جوال هند لا لا كان يلاحقنا ويصورنا الكلب بس خذيت الجوال منه قبل يهج
وماقدرت هند تتغلب على خوفها منهم
وتتغافل متعب وتسحب الجوال من يده بحركه خاطفه وتدفعه بقوه بعيد عنها وتهرب بسرعه البرق منهم
متعب يقول للعيال الحقوها مصورتنا هاتو الجوال منها والعيال طارو بين السما والارض والكل يركض وراها ومتعب يقول لهم تراها بنت ياعيال
الكل يركض وراها وهي بأقصى سرعتها تركض وتشوف باب بيتهم قريب
كاميرا الجوال بالكاد تلقط شيء من الحدث شماغ ثوب نعال اسفلت سياره صور متقاطعه واكثر الوقت صوت كاميرا الجوال وهي ترتطم بجسم هند وهي تركض
خطوات تفصلها عن بيتهم وخطوات تفصلها عن الي يلاحقونها
يارب يارب يارب يارب < تمتمة هند وهي واصله يقطع هالتمتمه صوت هند وهي تصدم في باب حديقتهم وتدخل ومايمديها تبي تصك الباب الا واحد منهم مدخل يده ويمنعها ماتقفله
خلت الباب مفتوح ونحاشت لداخل البيت كانت تصعد لغرفتها وهي تنزع عنها الثوب والشماغ قبل يشوفها أي احد بالصدفه دخلت غرفتها وقفلتها عليها وراحت عند الدريشه تستطلع الأمر شافتهم وهم واقفين عند باب الحديقه وهو مفتوح وكأن واحد منهم يتفلت وهم يمسكونه ويهدئونه
فتحت دريشتها شوي تبي تسمع وش يقولون
. ياولد اركد خلاص البنت دخلت بيتهم وش نسوي
انتو ماتفهمون البنت مصورتنا بكرا تلقونها منزله الفديو بالانترنت وننفضح
ولو صار شي للسكران بيجرونا كلنا
.لا لا هي كانت تقول لي انها ماصورتنا
وانت مصدقها انا مالي شغل والله ما اخليها ان لو اضطريت اسنتر عند بيتهم لين تجيب الجوال
. ياناصر خلاص مشينا الحين ونفكر بعدين وشلون نجيب منها التصوير امش خلصنا لايطلع علينا احد من اهلها وتكبر السالفه
وقفت هند تراقبهم وهي مرعوبه لايسببون لها مشكله
وبعد فتره قصيره انسحبوا من المكان وانهارت على سريرها وتردد الحمد لله الحمد لله الحمد لله جلست تتفقد اصاباتها
وبعد ما استجمعت انفاسها وهي مستلقيه على سريرها دخلت في نوبة ضحك
ومسكت الجوال وشغلت الفديو وتابعت كل تفاصيله وبعد ماخلص
أرسلت لللسته كلها ضحكه طويله
ههههههههههههههههههههههههههههههههههههههههههههه
وفيس يغمز
وتسحب لحافها وتندعس بفراشها وتروح عليها نومه

يسعدني اول وحده ارد ههههههههه

بصراحه بطله هههههههههههههههههههههههههههه

القصه صج ولا خيال؟!

ههههههههههههههه
يسعدني اول وحده ارد ههههههههه

هههههههههههههههههههههههههههه


يسعدني اول وحده ارد ههههههههه

هههههههههههههههههههههههههههه


يسعدني اول وحده ارد ههههههههه

هههههههههههههههههههههههههههههههههههههههههههههههههههههههه

هههههههههههههههههههههههههههه