مـلآإمح حلمنـآإ

قصيـدة مـلآإمح حلمنـآإ


قالت لي أبي منك تحقق ف النظر بي زود
وأنا أحسبها مزوح وما حسبت حساب روعتها

رمتني بسهما و أصبحت على سهم الهوى محسود
من عيون البشر لو هي بصدفة يوم مرتها

تقابلني بضحكتها و نظرة من عيونًٍ سود
تذوّب خافقٍ يفرح بضحكتها و نظرتها

أموت ف جمر شفتها و صف اللؤلؤ المنضود
و ذاك الجيد و شعاع الجبين و لون بشرتها

و خدودٍ أيا ويلي عليها في خجلها خدود
تقول ورد يوم الحب تتلون بحمرتها

قوامٍ يسلب الناظر و شعرٍ أسودٍ ممدود
يبعثره الهبوب و هي مشغولة بطرحتها

تعدلها بكفٍ به من آثار الخضاب ورود
و عيني ترقب الطرحه ف شيلتها و حطتها

هواها عشعش بقلبي و خلاني أجي و آجود
بشعرٍ عذب أوصف فيه إحساسي ف شوفتها

و صرت أتحيّن الفرصة وأجيب من الكلام حشود
و لا من شفتها ضاعت حروفي بس لهيبتها

فنظرتها أشوف أنثى مثلها في البشر مفقود
شموخ و عفّه و طهر و دلالٍ زاد رقتها

لجل ترضي غروري في محبتها تصون عهود
وأنا أًصون العهود اللي خذتها في محبتها

جميل طباعها خلا فؤادي يبتعد و يعود
إلى نفس المكان اللي بدت لي فيه قصتها

هواها أسهر عيوني و غيري من الأنام رقود
و هي مثلي تمر أيام ما ظفرت براحتها

تكحل عينها بصورة ملامح حلمنا المؤود
و أنا أسلي عيون الحب ف الفرقا بصورتها

نذوق الهمّ لكنّا عن أحلام الغرام نذود
نمني النفس بوصالٍ تنسى فيه علتها

مصيبتنا ف هذا الحب طريقٍ شائكٍ مسدود
و إذا حنا فتحنا أبواب جات ظروف سدتها

لكن ما لنا إلا إله واحدٍ معبود
عليم بحالة قلوبٍ تخفي نار لوعتها

و لازم ما تجي ساعة ننول بها الهنا المقصود
و ننهي حيرة سنينٍ حلاوتها ف قسوتها


و سلـآمتكم
آلنـآيف (R.A)