بسم الله الرحمن الرحيم
انا ولد زيي زي اي واحد درس 12 سنه من حياته وبعدها قرر يدخل جامعه
تخرجت من الثانوي وقدمت على جامعه الملك سعود
نسيت الموضوع وسافرت واستانست الحمدلله وشوي يطلع صوت رساله من جوالي قريتها الا من جامعه الملك سعود يقولون تم قبولي الحمدلله انا من الفرحه فيه ناس كانو معاي كنت اشوفهم كل يوم قمت سلمت عليهم بعد ما قريت الرساله واحب فيهم وبوسات عالماشي ههههههههه وحتى رحت عند ولد عمتي وكان يلعب كوره وجالس اقول له قوم سلم يقول ليه اقول له قوم يقول قل ليه طيب اخر حاجه طلع سرواله مشقوق هههههههههههههههههههههه
رجعت البيت وعلمت العايله وانواع التباريك وحركات ودعوات وشغل قوي
شوي قال ابوي احجز ورح للرياض عطهم ملفك وكل حاجه
قلت طيب واحجز اقرب رحله واجي الرياض طبعا بيتنا كان فاضي هلي كلهم مسافرين وانا وسوست لحالي فالبيت اقوم من النوم ما القى احد اسولف معاه وما القى احد اساله وش الغدا
اخر حاجه كلمت العيال وخليتهم يجون ينامون عندي وتيسرت الحاله
المهم خلصت الصيفيه وتبدا الدراسه وانا كاتبين لي فالموقع اروح كليه المجتمع هناك السنه التحضيريه الترم الاول واروح وفيني بعثره مشاعر
شعور اني خلااااص كبرت مافي احد اكبر مني
وشعور ثاني اقول الله يستر من اللي بيكونون معاي يارب ما يطلعون قلق وبثاره
وشعور ثالث مستانس عشاني باغيب اول اسبوع يقولون مافي تحضير
رحت اول يوم طلع سخافه يقولون بس تصور وطلع بطاقتك الجامعيه
تحمست قلت من جد مافي دراسه واغيب اول اسبوع
يوم داومت الاسبوع الثاني يقولون علي غيابات هههههههههه
وتعرفون حركات الفلسفه لازم اناظر اللي معاي فالقاعه واسوي افهمهم من كلامهم وحركاتهم
فيه ناس اول ما شفتهم قلت ذولي سبك طلعو فله واللي اقول انهم كويسين طلعو ابيخ شي
والشي اللي توهقت فيه الترم الاول كلمه استاذ
كل شوي اقول استاذ استاذ ويناظرني بنص عين ويرفع اصبعه السبابه وياشر علي ويقول دكتور اسلك له واقول طيب هههههههههههه
يا الله صباح خير
ايوه يلا نكمل
ومرت الايام وصارت علاقتي فالجديدين حلوه نطلع ناكل مع بعض نستهبل مع بعض والشي اللي عجبني مره فالجامعه البلوت خصوصا ان كليه المجتمع قاعاتها كبيره اذا جانا بريك والا الدكتور كان فاهي على طول نلعب
بس جا ابيخ شي يوم قالو لازم تسوي بحث هههههههههه
يوم شفت اللي معاي داجين قلت مالي الا مكتبه الدكتور الله يهديه حطني مع ثلاث بدو واحد توه جاي من قبل الافلاج يقول هجره حتى ايميل ما عنده والثاني ساكن فالرياض بس ما يتعامل مع الكمبيوتر وحطني مع واحد توه جاي من الدوادمي وما يعرف ولا حي فالرياض الا اللي ساكن فيه ولد عمه وتوهق يا دحوم ههههههههه
قلت مالكم الا نسوي بحث من مكتبه قالو خلاص واروح عند السوداني قلت ابغى بحث ومن ذا الكلام قال باضبطك قلت كفو ما قعد 4 ايام الا وهو داق علي يقول خلاص يوم وديته للدكتور طلع لي عيوب كثيره فيه وفوق كذا يقول اكيد مو انت اللي مسويه قفطه ذا الدكتور
ولا عاد اذا طلبو تكاليف كل واحد يبغى له ملف مره ملف انجاز ومره الملف الشفاف ابوطقطق وكم واحد يحله والباقين ينقلون منهم ويطلع اللي حلو التكاليف حلهم غلط وياكلونها العيال ههههههههه
بس اهم لحظه يوم قالو بطاقه الصراف يووووووووووووووووووووووه
يمين كتمه ذاك اليوم فالسيب كل واحد يبي يدخل اللي قعد يكح واللي عرق طفشو الناس بس تعرفون نظام عادي عادي فيه فلوس اصبر هههههههه
المهم دخلت وعطوني البطاقه لقيت مكتوب فيها بدالرحمن يعني عبدالرحمن قلت يلا اهم حاجه تجي فيها المكافئه وخلاص ونروح نصرف بعد ثلاث ايام اتوقع اسمعو القاعه كل واحد يسال الثاني كم باقي من مكافاتك الشعب يحب ذا السؤال لقافه هههههههههه
ووقتها ما قلت لاحد عطني البن حقك اخاف اكون استعجلت يوم قلت له بس اذا سالوني كم البن الشكوى لله لازم اعطيهم
بس احلى محاظره كانت الانقليزي كان عندنا واحد امريكي شايب مسلم فله
واضحه انه اجنبي ولحيته مو سوداء ولا بيضاء زي شيابنا ويلبس ثوب ساحب عالبدله يعطينا قصص عن ايام الحرب العالميه الثانيه العيال ما يفهمون معاه بس يناظرون حركاته وهو يسولف يكون ياشر بيده وملاكمه وشغل قوي ههههههههه لبى قلبه الله يستر عليه
من بعده جانا واحد اسمه مايكل امريكي شايب معفن مخيس يااه كرهني فالانقليزي يدخل وينافخ نفسيه شوي يرقص يالله حسن الخاتمه بس المهم انه كره كل القاعه فالانقليزي بس هو كان حق الفتره الاولى من 1 الظهر لين 3 ومن 3 ونص لين 5 كان عندنا واحد اسمه عزير يا حليله
كنا نحضر عنده واول ما يعطينا ظهره نطلع هههههههههه يقعد يقول لنا يبغى يجيب زوجته من بريطانيا ومدري ايش الزبده كليه المجتمع كانت حلوه الحين فالسنه التحضيريه اللي فتركي الاول
اممممم وطبعا اكثر السوالف اللي كتبت عنها فكليه المجتمع بس نسيت اقولكم عن اللي يدرسنا عرب
ههههههههههههههه دكتور الله يستر عليه نشبه لازم يقول فكل محاضره كلمتين تكليف والنظافه ههههههههههههه يحاسبنا احنا اذا شاف الجامعه وسخه نقول له احنا اهم حاجه قاعتنا يقول ما يصلح هذا مو منظر والله مشكله يعني مدري هم جايبين دكتور والا واحد شغال فالبلديه
والعن شي فالجامعه اذا قال لك الدكتور اطلع اشرح لزملائك هههههههههه يستلعنون العيال كل واحد يصير يحب يسال ويشارك ويحبون يوهقون هههههههههههه والدكاتره يضحكون مستانسين عالموقف انا كنت اوهقهم قبل ما يوهقوني ههههههههه على طول اقول لهم اشرحو لي وش معنى ذي الكلمه بس يقلبون علي يقولون انت ما شرحتها يلا فهمنا
وبريك يوم الاثنين الله ساعتين نروح نتغدى ونطلع مو عند مطاعم الجامعه الله يكرم النعمه عليهم فلافل ابرد شي فالحياه بس مواقف كليه المجتمع يووووه يعني فيه ناس نحفو بسبب المواقف يوقفون بعيد ويجون مشي ويرجعون يطلعون وقت البريك يروحون لين سياراتهم ويتغدون ويرجعون يوقفون بعيد هههههههههههههه ونفس الموضوع كل يوم
امممم من جد مالي نفس اتكلم عن الجامعه وخصوصا انو الاجازه بدت بس يلا لازم اكمل اللي بديته
خلوني اقول لكم عن ايام الاختبارات النهاىيه بدت العلاقات تتفكك خصوصا مافي ملخصات هههههه
يعني لو فيه كل واحد يتمصلح ويروح للثاني وشغل زي كذا بس مافيه قمنا خلاص نتقابل فالاختبار
بس كانت حلوه اختبارات الجامعه اختبر واريح4 ايام بعدين اختبار ثاني وعلى ذا النظام لين خلصنا
ويوم جت الاجازه خلااااااااااص تشتتنا وكل واحد راح فطريقه تقابلنا فالمبنى الجديد حق السنه التحضيريه وفرقونا الجامعه ما خلو معاي الا واحد من العيال ولو علي الاختيار كان ما اخترته بس الشكوى لله والحمدلله على كل حال احسن من غيره
المهم رحت المبنى الجديد اكثر اللي فيه فاهين ما يعرفون فيه شي داومت اول يوم واسال اللي عند الباب وين قاعتي طلع وداني قاعه غلط
بس يوم عرفت قاعتي وادخل والقى الدكتور فهد خان ههههههههه لله دره ذا الدكتور
الزبده ما طول معنا محاضره وحده وبعدين انقلع وجاانا غيره
وفيه ناس معاي فالشعب الجديده مسوين فيها يعنني ثقه فالنفس واللي مسوي انه القياده ههههههههه
واحد شكله كبير مره وفيه الدشير ولا ننسى المهايطيه واكيد انا العاقل هههههههههههههههههه
ويرجع نفس السستم يتعرفون على بعض ولازم ولاحظت اكثر شي انو اذا جو يتعرفون على بعض يا يسولفون عن الجو والا سواليف وسخه وتشبيك بنات وطلعات ومدري ايش هههههههههههههه
واللي جوه كويس يسولف عن معسل وكوره وللحين فالفصل الثاني وفيه قصص كثير ما قلتها بس خلاص الحين اجازه
اجازه تايم
موضوع: حياتي الجامعيه 
الثلاثاء أبريل 05, 2011 3:17 pm
> بدا التنح 
ما اعرف اسوي مدونه هههههه وكذا مرتاح احس ازين 
