الحمد الله باني مسلم وانت احمد ربك بانك مسلم ؟

[ندعوك للتسجيل في المنتدى أو التعريف بنفسك لمعاينة هذه الصورة]

احم احم…ثم احم…

الموضوع…باين من عنوانه…(ماجا على بالي اني باقول القصه لحد…لكن عقب سنين…عرفت الجواب…وحبيت تسمعونه…)

قصه صارت لي سنة 2000 لما كنت في امريكا…وعمري ذاك الوقت 17 سنه…وصاحبي عمره 19…
كنا شلة شباب…6 اشخاص من قطر…و 2 من السعوديه…
الاعمار تتفاوت…لكن اكبرنا كان 22 سنه…واصغرنا كان 17 اللي هو انا…

كنا رايحين لغه…وتصادف الزمان والمكان…ان حنا السبعه نجتمع…
حنا القطريين محد يعرف الثاني…والسعوديين كانوا عيال عم…
تلاقينا في جامعه امريكيه…وكنا رايحين لغه…سكنا كلنا في مجمع الجامعه…وتشاركنا في الشقق…والغرف…

المهم…

صاحبنا اللي القصه تدور عنه…نرمز له ب “فلان“…كان يحب وحده معانا في الصف…(طبعا في ذاك الوقت والعمر…اي شي نقول عنه حب…)…
فا كانت اللي يحبها…صينيه…وهو معجب فيها كثير…وهي كذلك…

كعادتنا…بعد الجامعه…كنا نروح انتمشى في المجمع(المول)…
منها انتغدى…ومنها نغير جو…شباب…في رحله…

خلصنا من المجمع…وبنرجع للسكن…كنا قاعدين عالرصيف…ننتظر الباص…وفلان كان جنبي…واشوفه سرحان…وفي عالم لحاله من طلعنا للجامعه من الصبح…
“ليش ربي خلقني مسلم“…
جاتني قشعريره…
“ليش ربي ماخلقني مثلها“…
التفت عليه…كلي استغراب…
الحزن مخيم عليه…“احبها…ماقدر اتزوجها…ليش ربي ماخلقها مسلمه…قطريه…”
فلان…شسالفه…وش قاعد تقول انت؟؟؟…

“ليش انا مسلم…وهي كافره…ليش ليش…”
هنا انا انربط الساني…وماقدرت انطق بكلمه…احس اني تيبست…
رد عليه واحد من الشباب…”تعوذ من ابليس…واترك عنك هالخرابيط…استغفر الله…وش تخربط انت…الحمدلله والشكر…”

رد وقال…“ردوا علي…ليش ليش…فهموني…انا انولد مسلم…وهي كافره…”

الكل هنا سكت…ومحد قدر يرد عليه…

وانتهي اليوم…وانا مصدوم من اللي صار…ومن خويي…وتفكيره…
لكن الادهى والامر…اني ماعرفت وش اقول له…او ارد عليه…
ابغي افهمه…ماعرف وش اقول…ابغي اخفف عنه…ماعرف وش الطريقه…

وعقب ماكبرنا…والعقل تفتح…وتثقفنا…ولله الحمد والمنه…
وانا نسيت القصه…وماطرت علي…الا لما…

ها يالربع جا وقت صلاة الظهر…يالله خلنا نصلي…شنو؟؟؟….من صجك علي؟؟؟…ليه وين المشكله…ماتشوف المكان…في الحديقه…وكله استراليين رايحين وجايين…وش تبغيهم يقولون عنا؟؟…
اشدخل؟؟…وانا وش علي منهم؟؟؟…وخلهم يقولون اللي يقولونه…ويضحكون…مافي مشكله…اهم شي نصلي…الصلاه في وقتها…ونوريهم عبادتنا حنا يالمسلمين…يا من صجك…لا لا يبا…احراج…بنصليها مع العصر في الشقه…اي بس حنا صار لنا فتره في استراليا…”براحتكم…انا باروح اصلي في العشب…والله يهديكم….ويهدينا…”

هنا تذكرت قصة فلان…ليه؟؟؟…
فلان والربع…ما احمدوا ربهم انه خلقهم مسلمين…

فلان…عشان حب او بنت…شكك في دينه…وفي ربه…(وهذا اللي حاصل في زمنا هذا…يعصي…وتوصل انه يكفر بربه…بس عشان بنت ترضي عليه…)
ولو فكرنا في اسألته…سهله…وماتحتاج فتاوي…لكن صغر السن…وعدم التفتح والاطلاع في الدين…ماعرفنا وش نجاوبه عليه…

الجواب كان الفطره هي اللي تحكم الانسان يعرف الصح من الغلط…
والاستدلال بحديث الرسول عليه الصلاة والسلام…
“مامن مولود إلا يولد على الفطرة…فابواه يهودانه أوينصرانه أو يمجسانه“

وجوابنا له لما سأل…ليه ربي خلقني مسلم…انك لازم تحمد ربك على هالنعمه…والا يمكن انك تعبد بقر…
وربي سبحانه…العدل…وحتى المسلم…المولود مسلم…عليه بالعمل الصالح…والايمان…
قال سبحانه…“قل اعملوا فسيرى الله عملكم“

وبالنسبه للربع…الحياء…والاحراج…امنعوهم…
ولو فكروا فيها…فا ان صلاتهم…بتخلي الاجانب…يفكرون وش قاعدين يسوون هذول…ويبحثون…ويدورون…لان شي غريب بالنسبه لهم…وماتدري سبحان الله…لعل وعسى حد يهتدي…

والاهم من ذلك… بصلاتك…تفتخر للجميع وامام الكل…انك مسلم…وتحمد ربك انك مسلم…

الاهداف اللي بغيت اوصلها من هالمقال…الموضوع…القصه…

- تثقيف عيالنا…مهما كان عمرهم…في الدين…وتوضيح لهم العقيده…وشرح مبسط لها…عشان يعرفون هم وش قاعدين يسوون…وعبادتهم ليه…فا التثقيف دينيا وعقائديا…
ولمروا في مثل ماحنا مرينا فيه…يعرفون وش يردون…خاصه في زمنا الحين…الله يجيرنا من الفتن…

- الافتخار انك مسلم قدام الكل…واهمهم الغرب…نوصل لهم فكرة حنا مسلمين…مب اذا ركبنا الطياره فصخنا العبي والشيلات…ولا حلقنا اللحى او خففناها“عشان ما اتعرض للقتل او التحرش“…ياخوي اذا بيتحرشون فيك ماراح تمسكهم قفل ولا لحيه…ترا اللحيه من دلائل الاسلام…فا بلحيتك…انت تنشر الاسلام…قال سبحانه…”ومن يتق الله يجعل له مخرجا…ويرزقه من حيث لا يحتسب“

- لا تستحي كونك مسلم…فا تتجرد من تعاليم الاسلام…من توصل للغرب…
تراهم في غفله عن ما حنا عليه يالمسلمين…ومايدرون عنا شي…غير ان حنا ارهابيين وقتله…ونروح الحج…بس
فا لحد اسالك…لاتنحرج وتتوهق…فهمه الاسلام على اصوله…وتعاليمه…

- ابتسم ابتسم ابتسم… لانك “مسلم“…واحمد ربك انك…”مسلم“

- طبعا في نقاط موجوده خلال الموضوع فوق…ماحبيت اعيدها…

ان اصبت فا من الله…وان اخطأت فا مني ومن الشيطان…

وان شاء الله ربي يعينا نبني جيل صالح…ومستقبل في طاعه الله ورسوله…

وان شاء الله وفقت في الطرح…ومحد تملل…احم…
“مو مواضيعي دايما طويله…الله المستعان“

ويامرحبا بكم…