قصة امل و اول يوم دراسي , الجزء الاول

عدد الرسائل : 26 تاريخ التسجيل : 28/04/2011

صباح الخير انا امل
بقولكم اليوم عن اول اجزاء قصتي الي صارت قبل فترة قريبة على امل تستمتعون معانا

تبدأ قصتي كبنت زي اي بنت مهمشة وسط عائلة مليانة ذكور عمري 17
اخواني شاغلين البيت بصجتهم و مشاكلهم و الاهل ساحبين علي ما يعرفوني الا وقت الاكل و الاعياد و المناسبات الوطنية Very Happy

مالكم بالطويلة انا ابوي رجل يتطلب عمله انه ينتقل كثير و تنقلنا في بيوت و مناطق كثيرة و هذا الي خلاني انتقل بمدارس كثيرة و لا اكون صداقات مع بنات كثار علاقتي تدوم معاهم سنة دراسية ثم نتفرق و لكن اكون تعلقت فيهم كثير

و لكن هالمرة غير ابوي قرر يستقر في الرياض و لا راح يكون فيه نقل و هالشي خلاني افرح لأني تعبت من كثر التنقل

كنا في اخر ايام الاجازة و الاهل قررو يحطوني في مدرسة اهلية قريبة من البيت و المدرسة كانت عادية لا هي فخمة ولا هي سيئة

سجلنا و بدأ اول يوم و انا فيني هالاحساس , احساس الرهبة من اول يوم بمدرسة جديدة علي
صحيح ان عشت هالاحساس كثير بس يظل مخيف

دخلت المدخل الرئيسي و المشرفة تستقبلني مالها خلق مررررة ( تونا اول يوم يا ابلة
Suspect

)

قلت السلام عليكم ما ردت علي و قالت شسمك قلت لها امل خالد قالت ايه يلا فصلك ثانية رابع توكلي

صراحة كانت بداية ما تبشر لأني ما كنت اعرف وين الفصل ولا ودي اسأل ام السعف و الليف مرة ثانية
رحت احوس في هالاسياب اطلع فوق و انزل تحت و شنطتي فوق ظهري كأني عجوز ايرانية بالعمرة
الين ما لقيت الفصل و كان الباب مسكر دقيت الباب قالت الابلة ادخل

دخلت قالت الابلة بأسلوب جاف مررة : ايوة نعم ؟ قلت انا امل طالبة جديدة في هالفصل قالت طيب يلا ادخلي

دخلت و نظرات كل الطالبات حولي و انا اكره هالاحساس لما كل الناس يناظرونك و انتي تمرين بين الصفوف ببطئ الين ما وصلت اخر الصف ولا في مكان فاضي وين طاولتي =(
التفت على الابلة قلت لها ابلة مافي كرسي ولا طاولة قالت طيب معليش وقفي الين ما تجيك الطاولة ما راح تموتين لو وقفتي , طبعاً الاحراج وصل القمة الحين ><

و انا واقفة و الابلة ماسكة قلم و قاعد تقول وش اسلوبها و طريقتها و الملخصات الي لازم نشتريها و انا شكلي مخيف اخر الصف واقفة و متكية على ظهري , دق الجرس طلعت الابلة و انتهى الهدوء الي كان بالفصل و جت اصوات السوالف و طق الحنك
و النظرات تنعاد حولي و تقولي وحدة بكل وقاحة يووه شكلك جاية بالتهريب ولا حسبو حسابك بالطاولة و ضحك الفصل علي و كأني ناقصة موقف ثاني يزيد خوفي من اول يوم

صراحة حسيت هاليوم مش ممكن يكون اسوء
لكن كنت غلطانة لأنه بيصير اسوء لما جت طاولتي قالت لي الفراشة انقلعي الين ما ننقل لك الكرسي و طاولتك لمكانهم و انا بروح على جنب تعركفت و طحت طيحة تفشل على وجهي و اسمع ضحكهم بقوة انقهرت و العبرة تخنقني الين ما حسيت بيد تمسك كتفي و صوت جهور يقول عيب يا بنات مالكم داعي ! بسم الله عليك صار لك شي ؟ عسى ما تعورتي

من كانت صاحبة هالصوت ؟ و كيف بيكون وضعي بالمدرسة بعد هالفشايل ؟

بقولها بالجزء الثاني لو اعجبكم الجزء الاول