الشعر يعني وبعض احيان مايعني
والجرح ضيفاً سكن بي والحشاء بيته
الشعر ارضي يوم ان الهم زارعني
الشعر نهرً شربني يوم صبيته
سهرت وجهي وكف الصبح يصفعني
كني بصمتي جرحته يوم ناديته
ياما تحملت في قربك ولوعني
قلت: اتحلم ببعدك لو عانيته
يلعن ابو الحلم بس الحين طاوعني!!
لو ادري انه بيصدق كان صحيته
مانته لحالك عشان تقول: بايعني
كثير كسروا ذراعي يوم مديته!
اكذب البعد لين الهم يقنعني
كني على كثر ماذكرني تناسيته
قبل نتفارق وتنسى جرحي سمعني
وش فايدة كل جرح في خليته
ماقلت لك: من بعد بعدك يسنعني؟
(هالحين شفني عمى بالليل سريته)
ضايع من الله وطاري البعد ضيعني
تبي تدله وطالع وين وديته,!,
ياكبر ظلمك تسافر ماتودعني
ماكنك اللي ذبحني لين حبيته
كم قلت لك:يآدمي بعدك يروعني
و ياكم جرح يجيني ما تحريته
اذكرني اليا نثرك الشوق واجمعني
واذكرني ليا حضنك اسمي وضميته
واذكرني اليا ذكرت الدمع قطعني
وان مر في خاطرك رقمي ودقيته
مع السلامه وقبل تسافر اسمعني
تبقى اكثر انسان بكاني وحبيته
\
\
مما رآق لي
موضوع: كم قلت لك:يآدمي بعدك يروعني و ياكم جرح يجيني ما تحريته 
الأحد مايو 29, 2011 6:11 pm
