روايه البويه مريم. والبرئه نوره

هااااااي بنات. كيفكم

جبت لكم روايه


نبداء مع البارت الاول

الفصل الأول: الماضي و الحاضر

نورة بنت عمرها 15 سنة.. ما يميزها عن باقي البنات هو وجهها.. فجمالها ليس كملامح ملكات الجمال.. بل أنه أجمل.. كيف؟؟
لقد سمعتم بالمقولة "الجمال الداخلي يعكس على الجمال الخارجي"
فقد أثبتت نورة هذا الشي.. هي بنت خجولة و لا تعرف كم هي جميلة.. أحيانا يخبرها بعض الناس و لكنها تظن أنهم يجاملونها..
هناك مشكلة مضايقتها و ما حبت تقول السبب الحقيقي اللي مضايقها..


سلوى عمة نورة: شفيك حبيبتي شاللي مضايقك؟؟؟
نورة: راح أبدأ أول يوم في الثانوية بكرة و أحس قلبي من الخوف راح ينفجر!
عمة نورة سلوى: و ليش كل هالخوف حبيبتي! مدرستك الجديدة مو مختلفة عن مدارس مصر
نورة: هذي مو الشي الوحيد اللي يقلقني..أمل و هدى يقولون إن المدارس الحكومة الثانوية متروسة مشاكل و بنات يركضون ورى المشاكل!!
عمة نورة سلوى فتحت عينها على الآخر!
"بنات يراكضون ورى المشاكل.. من وين لهم هالكلام!"
نورة: مادري يا عمتي المهم.. أنا بروح أنام.. بكرة أول يوم مدرسة و أبي أكون نشيطة"
سلوى: تصبحين على خير حبيبتي
نورة: و انتي من أهله عمتي.


نورة بنت درست طول حياتها في مصر.. لأن أبوها شغله هناك.. هي شافت و تعرف كل أنواع المصائب.. فأمها توفت و هي عمرها ثلاث سنين بس.. فكل الحنان اللي حصلته كان من أبوها في مصر.. بس أبوها لاحظ كيف هي تعيسة من غير أم تنصحها أو أخت تجابلها أو أي أحد يعطيها حنان الأم.. فقرر أن يرجع بنته بلدها في الخليج لتعيش مع أخته الكبيرة.. عمتها اللي حنانها حنانها يغطي على ديرة.
نورة من النوع الهادئ.. ما تكلم أحد من غير ما يبدأ هو بالكلام.. ما تحب تشوف أحد في عينه و هو يكلمها.. البعض يقول أنها طالعة على أمها.. خجولة و هادئة.. و الآخر يراها متأثرة من وفاة أمها.. فعمتها ما حبت الوضع.. فقامت و عرفتها على بنات الجيران.. أمل و هدى.. حبتهم من قلب لأنهم أول بنات تعرفت عليهم في حياتها و بدأت الشمس في بداية شروقها في حياة نورة..


غسلت وجها و وقفت تطالع روحها في المنظرة..
"أول يوم.. الله يعيني.. الكلام اللي سمعته من البنات خرعني"
فكرت نورة و هي تناظر روحها في المنظرة
"إنشالله يكون المنهج سهل.. هذا أهم شي"
سلوى: يلا نورة نزلي أكلي الريوق راح تتأخرين عن المدرسة
نورة: إنشالله عمتي أكاني ياية
لبست نورة قميص أكمامه طويلة و عليه المريول و ربطت حزام المريول بطريقة مرتبة
لمت شعرها البني الفاتح الطويل بربطة تناسب لون المريول و رشت رشة خنة صغيرة.. كان كل شي مرتب و
ناعم فيها.. بس ليلحين كان فيها نوع من الوسواس


نزلت نورة و هي تركض.. حبت عمتها و ركبت السيارة.. و بدأت تدلي السايق المدرسة.. كل ما قربت من المدرسة كل ما قلبها دق أسرع.. في مصر كانت تدرس في مدرسة خاصة تمزج فيها الأولاد و البنات و لكن شخصيتها و طبعها عمره ما قربها من أي من الأولاد.. و لا حتى البنات.. بس بسبب عمتها و تعرفها على هدى و أمل.. كانت نورة متشوقة للقاء بنات جدد.. بس ما تدري شنو راح يصيير لها في هذي المدرسة اللي بتكون لها أول مرة تحط رجلها في مدرسة حكومية في بلدها.


نزلت من السيارة و هي تناظر يميين و شمال.. كأنها خايفة من شي.. و بدأت تمشي بين البنات و هي منزلة راسها.. و كل ما ترفعه شوي كل ما تشوفه وجوه بنات.. الكثير من الوجوه و كلهم ممسوحين في نظرها لأنها ما قادرة تركز.. هذي أول مرة تشوف بنات بهالعدد في مكان واحد.


وقفت نورة في مكانها و هي لامة يدينها و تطالع الأرض و الشي الوحيد اللي حابة تسمعه هو جرس بدأ الإصطفاف اللي بساعدها من الإبتعاد عن الوحدة. المشكلة اللي زادت هم نورة هو ميولها المختلف عن ميول أصدقائها هدى و أمل.. هي تحب الطب و كل ما تتمناه حاليا هو أن تكون طبيبة تعالج الناس و تنقذهم من الموت.. من يوم وفاة أمها قررت هالشي.. مرض أمها و وفاتها خلها تحس بأهمية معالجة صحة الآخرين. فقد دخلت المسار العلمي. أما بالنسبة لهدى و أمل فهم يرون المسار التجاري أنجح هالأيام.
كانت نورة واقفة تفكر في هدى و أمل..
و فجأة!!!


أنقطع حبل التفكير بصراخ بنت.. بل بنتين
ظنت نورة بأنهم بموتون و حطت يدها على قلبها.. بس في الصج طلع أنهم فقط فرحانين بشوفة بعض.. و ما تم لمة و ما تم بوسة..
مرة وحدة سمعت نورة وحدة تكلمها من وراها.."اللي يقول ما شايفين بعض من دهر!"
ضحكت نورة و إلتفتت وراها لتشوف من كانت تتكلم
شافت بنت طولها نفس طولها بس كانت ممتلئة شوي و شعرها مربوط بنفس الطريقة بس كان أقصر من شعر نورة اللي يوصل لنهاية ظهرها و البنت كان مبين عليها حبوبة.
"لا تخافين منهم ترى كل سنة هالبنات يسوون هالحركات حتى لو الكل يدري أنهم يشوفون بعض كل يومين في الإجازة"
وقفت نورة مبتسمة و مستانسة بأن وحدة من البنات جات تكلمها.
" أنا أسمي العنود.. في صف الثاني الثانوي و انتي مبين على شكلك أن هذي أول سنة لك في المدرسة"
"هههههه.. أنا نورة و هذي أصلا أول سنة لي في البلد!"
العنود: من صجك! عجل ما تعرفين ولا شي عن مدرستنا و لا أحد من البنات!
نورة: أي والله.. أنا وايد خايفة بأن تكون المدرسة على سوء ظني.. عندي ربع نفس سني بس مدرستهم تجاري.. و سمعت منهم كلام يخوف!
العنود: كلام يخوف! مثل شنو؟
نورة بصوت واطي: صج في بنات يدخنون سجاير الله يكرمك.. في الحمامات من دون ما يعرف أحد؟؟!!
و تطلع العنود ذيك الضحكة العالية.. و تقعد نورة تتلفت وهي منصعقة لأنها أول مرة تشوف أحد يضحك كذا
العنود و هي تضحك: هاهاااااااااااي
العنود: شوفي بقولك حبيبتي.. مافي مدرسة في البلد كامل ما فيها مشاكل.. و لأني أخاف عليك بقولك أن التدخين أقل شي لازم تخافين منه.. في سوالف أخس من كذا..
نورة: هااااااا؟؟!! أخس من التدخين! شنو هذا اللي أخس من التدخين!! و ين المشرفات.. وين المديرة عن هالسوالف! أنا ما فاهمة!
العنود: و مين قال أن هذي السوالف الكل ينصاد فيها.. و المشرفات أصلا يدرون بس مافي في يدهم حيلة.. و مافي فايدة! بس انتي بتعرفينها و راح تشوفينها جدامك كل يوم.. إنتي خلك بعيد عنها و راح ترتاحين و تحملي تجربين من بنات لهم هالسوالف.. لأن ذبحتهم يفروون مخ الوحدة.
نورة سكتت و هي مفهية!
نورة: ما فهمت ولا شي من اللي قصدك! أي سوالف ذي!
العنود: يا الله!!!!!
الله يعينك حبيبتي.. إنتي بس خلك معاي و راح أفهمك اللي تبينه بعدين لأن أحين وقت الإصطفاف و راح نتأخر.
إبتسمت نورة للعنود و مشوا ثنتينهم و الجرس كان يدق.. وصلت العنود نورة لصفها و خلتها توقف بالأول.
العنود: أشوفك في الفسحة إنشالله.
نورة: مشكورة على كل شي حبيبتي.
العنود: هذا واجبي والله
راحت العنود و تمت نورة واقفة في مكانها و إلا تلمح بنت من بعيد خلتها ما تصدق اللي تشوفه.. أنا أتخيل و لا
حقيقية اللي أشوفه! كيف بنت بهالشكل في المدرسة و ليش؟؟؟



اشوف تفاعلكم معاي عشان انزلكم البارتات الباقيه

يالااا لا تحرموني من الردود الحلوه

يسلمو عالروائه الروعه .....
وانتضر ألبارت الجائ على أحر من الجمر

كممملي ننتظرك يعطيك العافية
باين حلوهه من البداية

الفصل الثاني: أول يوم


وقفت نورة تطالع هالبنيه من بعيد منصدمه ..!!
البنيه طولها يمكن ينقال عنه طويل و كان شعرها بوي و مسوية تسريحة صبيان شلون موقفه الشعر ومضبطه حالها .!! و مريولها كان وسيع و كانت رافعته لي فوق ركبتها ..!! القميص جافسه جمومه لي نص إيدها.. الساعة طبعا.. ساعة رجالية!! و الجوتي رياضي !! و نظارة سودة خاشة شكل عينها مومبين ويها كله بس ملامحها وشكلها على بعضها صبي..!!
انصعقت مكانها فجأه اطالع هالمخلوقه شنو بالضبط !!
إلا تشوف البنتين اللي شافتهم يصرخون الصبح...شافت منظر غريب !! .. شلون ركضت وحده منهم حق البنيه الي جنها صبي و أخذتها و لمتها ليما أرفعتها عن الأرض .!!! و البنت الثانية تطالعهم وتضحك بصوت عالي حييل ..!!
نورة ما فهمت اللي يصير جدامها شنو..!! بس طبعا اهي مو من النوع اللي تحب الشماتة ولا نوعيتها الي اتنح بحد وتخوزز اكتفت ان تلف ويها وماترد اطالع شيسون عقب الي شافته ...

من بعد ما خلص الطابور وراحو الصفوف ركبت نورة الدري مع باقي البنات و مع الابله اللي تشرف عليهم .. كل البنات كانوا مبتسمين و يسولفون و مافي في قلبهم شي غير السوالف اللي منحوتة عليه.. أما نورة كانت الوحيده الخايفة ودايما مرتبكة.. صج البنات هذا أول يوم حقكم في المدرسة عقب العطله بس اهما كانوا يعرفون بعض من المتوسط والابتدائي او من السنه الي طافت ... حتى اللي ما كانوا مقربين تقربوا لأن الإنسان معروف عنه من بين الغريبين يرتاح للشخص اللي شايف وجهه و معتاد يشوفه.
البنات دخلوا الصف و نورة وقفت برا عند الباب و اهيا اطالع البنات و اهم يقعدون على كراسيهم و اللي زاد إرتباك نورة اهو سماعها لإزعاج البنات و هم يسالفون.. فهي ما كانت تفهم اللي يقولونه بس اللي تسمعه كان خرابيط ما تنفهم و كلام ملخبط.. مرة وحدة راح التلخبط عن مخ نورة يوم سمعت..
"يابنيه .!! ليش واقفة عند الباب دخلي داخل الصف!"
خافت نورة لما سمعت صوت مدرستهم وداد.. اللي يبين عليها من النوع الشديد وشكلها على بعضها مبين عصبيه ..
نورة: ان شاء الله بدخل ..

دخلت نورة الصف و هي تمشي بكل هدوء و خفة.. بعض البنات وقفوا سوالفهم و قعدوا يطالعونها بنظرات ان منو هالبنيه؟ اول مره يشوفونها .. بس اهي مشت و قعدت على كرسي فاضي في ثالث صفة صوب الباب...
ابله وداد: سكووووووت يا بنات.. يــه .! كل سوالف الصيف طلعت الحين كل وحده تسكت يلاااا شحقه معطينكم عطله عيل .؟!
وحدة من البنات صرخت تضحك واهي بمكانها : عطونا العطله للأكل ههههههه
وقاموا البنات كلهم يضحكون على ردها للأبله ..
ابله وداد: حلو حلو ضحكو بعد كملو كملو ..!!
اهني الابله لما قالتها بطنازه سكتوا كل البنات محد قام يضخك وبدت تتحجى
ابله وداد: بنات أنا اللي راح أدرسكم عربي ومن اليوم ورايح الكل يتأدب و ما يرد علي بهالإسلوب الوقح .!! ترى على السلوك له 10 درجات واهوا أهم من المشاركة عندي.

البنت سكتت و اهي تطالع الأرض.. ما توقعت ردت فعل الابله راح تكون جافه جذي ..
وعقب كلام شكثره وشرح شرحته عن الماده وشتبي من البنات وهالسوالف
فجأه رن الجرس...
طلعت الابله و دخلت ابلة الحصة الثانيه من بعدها وكان وراها بنتين شايلين الكتب مالت المادة و كانت وحدة من هالبنتين البنت اللي كان شكلها مسترجلة ..
الابله: اوكي مشكورين بنات ما قصرتوا خلو الاغراض اهني خلاص
البنت المسترجلة: افا علييج تامرين على أي شي ثاني.. انا حااااضر
كانت تكلم المعلمة و صوتها خشن و مبين عليه أنها دفاشه ومخشنته عن عمد و طريقة كلامها طريقة كلام الصبيان و حتى الوقفة امبيه ! وهاذا غيرتعابير ويها
قبل ماتطلع البنيه من الصف نادتهااا وقالتلها
"أبيج هالمره تروحين الصف بدال هالدوارة بالمدرسة.. ترى إنتي مو بمجمع عشان تفتريين..!"
البنت: هههههههه.. لالا إن شاء الله عشان عيونج بس والله راح أروح الصف هالمره ..
نورة تطالع هالبنيه و اهي مو مصدقة أنها بنيه بالأساس!
مشت البنيه المسترجلة و قبل ما تطلع من الصف إلمحت نورة واهي قاعده اطالع فيها ومتنحه مصدومه من شكلها.. فقامت البنت تبتسم لها و مبين عليها منبهرة من شكل نورة اللي يجذب..اهي ماستوعبت ان تخوزز فيها لما شافتها ابتسمت وخرت ويها
صحت نورة من تفكيرها لما حذفت وحدة من البنات دفترها على طاولتها.!
نورة: شكرا
ما ردت عليها البنت و مشت عنها..
خلصت أول ثلاث حصص و كان وقت الفرصه .. كانت حاسة روحها هلكانة ..
كل البنات قاموا من أماكنهم وطلعوا برا الصف بس اهي تمت بمكانها لأنها ما تعرف وين تروح في المدرسة ولا تدل شي فيها ..
مرة وحدة دخلت العنود الصف و راحت عند نورة..
العنود: هاااااا إنتي قاعده.؟! .. توقعت ماراح القاج .. شلون جو المدرسه؟
نورة: والله شاقول لج.. من بعد ما شفت الكتب و الجدول اليومي.. تعبت نفسيتي.. حتى الابلات بعد رتحتلهم كلش!
العنود: أكيد لازم بعد ثنوية.. الابلات شي طبيعي متشددين أكثر.. المواد أصعب بواااايد.. و حتى تعب بالدراسه الحين لازم يكون دبل المتوسط والسنه الي طافت واذا عن سالفت البنات بتشوفين أشكال و أنواع على كيف كيفك كل يوم عاهه يديده !
نورة كان بيغمى عليها من كلام العنود.. ما صدقت أن الثانوية بهالشكل!
نورة: بصراحة.. ما توقعت الثنويه لي هالدرجه جذي !
العنود: راح تتعودين عليها مع الايام.. المهم إمشي معاي برآ الصف.. أدري إذا ما طلعتي راح تتعقدين أكثر
نورة و هي قايمة من مكانها: شنو.؟! منو قالج أني معقدة؟؟؟!!!
العنود: وييييييييي آسفة غلطنا.. يلا سموحة
نورة تضحك: أوكييي عبالي ههههههه
خذت العنود نورة و راحوا يتمشون في ساحة المدرسة.. بعض البنات كانوا يطالعون نورة بنظرات ما كانت قادرة تفسرها.. كانوا البنات أكثريتهم مكحلين عيونهم.. و الشعر إستشوار و اللي مسرحته بالجيل و التراجي توصل للكتف.. و نورة طبعا ما يدش مخها هالشي.. بنات في مدرسة و شكلهم رايحيين عرس او حفله ..!!
نورة: العنود ممكن أسألج؟
العنود: سألي الي تبين ماله داعي ممكن شنو قولي؟
نورة: شلون هالبنات يتمشون في المدرسة من غير ما تقولهم شي الإدارة؟ خبري هالأشياء ممنوعة!
العنود: أي اكيد ممنوعه بس سوالف من تحت لي تحت عادي وايد تصير
نورة: هاااااا؟؟!! ما فهمت شلون من تحت لي تحت!
العنود: يعني الإداره تدري إن هالشي بالمدرسة بس يسمعون عنه و ما يشوفون البنات بعيونهم ..
نورة: و شلون ما يشوفونهم؟؟
العنود: البنات بالفرصه و أي وقت الابلات و الإداريات موموجودين تشوفينهم جذي معدلين شكلهم.. بس وقت وقت الاداره يقومون و يمسحون الكحل و يخشون التراجي وجنا ماصار شي
نورة: امبييه .!!
العنود: امبيه انتي..! انتي من صجج تو تدرين عن كل هالأشياء؟ من وين طالعة انتي بعرف؟!
نورة: ههههه.. لا بس أنا شخصيتي مو إجتماعية لهالحد.. يعني ما عندي أحد مثلج فاهم و يفهمني.
العنود: هههههههه أقووولج ليش..

مرة وحدة كورة سلة بكل سرعة تمر من جدام نورة و العنود و بكل قوة تضرب الطوف..
و من الخوف طلعت نورة صرخة صغيرة من غير ماتحس ..!!
لفت ويها عالكره وعقبها رفعت راسها.. ومره ثانيه ردت شافت البنت المسترجلة تركض من جدامها و تاخذ الكرة من الأرض و وقفت جدام نورة و إبتسامة على ويها و هي تقول: مسامحة يالحلوة..
نورة ما ردت عليها.. بس سكتت و البنت ردت للبنات اللي نفس شكلها تقريبا .. وكملوا لعب
نورة ما كانت مستوعبة باللي صار.
العنود: إسمها مريم و اهي في التوجيهي
نورة: شنو؟! أي مريم.!
العنود: البنت اللي خذت الكورة مساع شفيج..اقولج إسمها مريم
نورة: أها..
العنود: غريبه ماسألتيني ليش شكلها جذي .!
نورة: هاااا.. ليش أسألك هالسؤال؟!
العنود: توقعتج راح تستغربين من شكلها.. و تسأليني سؤال عنها هاذي عادتج هههههه
توها كانت نورة تبي تقول للعنود شي و إلا الجرس يرن و إبتدت الحصة الرابعة
العنود: بييييييييه! يماي علينا ابله وداد! راح تذبحني إذا تأخرت.. أشوفج في الهدة نوره .. بااي باي !
طالعت نوره العنود شلون راحت عنها وركضت حق صفها ..
إلتفتت نورة الصوب الثاني إلا مريم تطالعها من بعيد.. ما سوت شي نورة بس مشت لي صفها عشان ما تتأخر اهيا بعد ومريم طالعتها من بعيد شلون تمشى وخذت الكورة و مشت اهي بعد.

انتظروا الجزء الثالث : الحقيقة والألم

كملي كملي كملي كملي تحمست مع الروايةة وقسمم يلآ بلييز لآتطولين علينا

ي لبيييييه نوره حيل بريئه كملي تكفين

الفصل الثالث: الحقيقية و الألم

طق جرس الهده و نورة قامت تجمع كتبها لسنه اليديده و يوم رفعت راسها إلا تشوف العنود واقفة عند الباب ناطرتها.. قاموا يتمشون مع يعض لي باب المدرسة اللي كانت زحمة من البنات عنده.. و إلا تحس نورة دزة قوية وعورها بطنها منها.. لفت.! ومره ثانيه هم تطلع هالمريم ومعاها بنتين نفس شكلها و ستايلها يدزون البنات بكل قوة عشان يمرون قبلهم..
العنود: قطيعه هالبنات مادري يعني ريشة على راسهم ولا شسالفه
سكتت نورة و ويها مبين عليه نوع من الإستياء بس في نفس الوقت للحينها مو مستوعبه هالبنات شنو بالضبط ..!
طلعوا نورة و العنود من زحمة البنات لزحمة السيارات اللي واقفة عند المدرسة..

العنود: منو ياخذج البيت بالهده..؟! .. ممم شرايج اوصلج.؟!
نورة و إبتسامة عريضة على ويها: لا والله سايق بيت عمتي الحين بيوصل
العنود: إنزين عيل نشوفج باجر وديربالج على نفسج
نورة: مع السلامة
وقفت نورة عند بآب المدرسة و اهي ناطرة السايق متى بيوصل ..
نورة في قلبها : أففف الجو وايد حار ليش تأخر علي للحين !
إلتفتت نورة إلا هم بعد مره ثانيه تطلعلها المريم و ربعها .!يركبون سيارة لاند كروز و.. كانت السيارة لمريم الظاهر لأن اهي كانت تسوقها...
مرت السيارة من صوب نوره عالبطئ و قامت مريم و نزلت الجام و طالعت نورة ..
ما فهمت نورة ليش كانت تطالعها فنظارتها السودة بروحها خشت نص ملامح ويها..
فجأه ولا سايق نوره وصل ... قامت تمشى لي السياره ونظرات مريم لها اكتفت ان تعطيها نظره وتسكر باب السياره ..
سكرت مريم الجام.. ومشت بالسياره اسرع من مساع ...

وصلت نورة البيت و هي تعبانة على الآخر.. دخلت المطبخ و إلا عمتها سلوى قاعده تقص الطماط للسلطة
نورة: السلام عليكم
سلوى: و عليكم السلام هلا نوره
وكملت تقصص السلطه
قامت نورة و جلست و حطت يدها على خدها و هي تطالع الجزر و الخيار اللي مجابلها
عمتها إستغربت.. نوره شفيج ضايق خلقج؟
سلوى: شفيج حبيبتي؟ عسى ما شر؟

نورة: لا ولا شي عمتي.. هذا أول يوم و شوي تعبانة.. أستأذنك بروح أنام شوي
سلوى: شنوووو؟؟ تنامين هالحزة؟ و الغدا حق منو مسويته إن شاءلله؟؟!
نورة: حطيلي الغدا و إذا قمت من النوم راح آكله
سلوى: على راحتج

خذت نورة كتبها و حذفتهم على السرير.. خذت دوش سريع و لبست بجامتها
إنسدحت على السرير و بدأت تقرأ أول 5 صفحات من كل كتاب عشان تكون عندها فكرة عن خلفية الكتب و عن شنو راح تدرس.

حطت الكتب حسب جدولها حق باجر و باقي الكتب في اليرار..
الي يميز نورة أنها بنت تحب الترتيب و التنظيم و ما تحب شي يكون برا إطار الحياة الطبيعية للشخص..
قبل ما تسكر نوره اليرار لاحظت صورة فيه.. قامت طلعتها من اليرار و قعدت على طرف السرير تطالعها.
و إلا دمعة تنزل على خدها.. الصورة اللي في إيدها.. صورة أمها اللي توفت و هي شايلتها لما كانت صغيره..
مرة وحدة حست نورة وخزة في قلبها.. و كأنها تشوف شبح أمها جدامها و مو صورة
تشوف شلون فرحة امهاواهي شايلتها وشلون اهي مبتسمة من قلبها لها ..

قعدت نورة مكانها و اهي تتذكر كل اللي صار قبل يومين و اللي خلاها متضايقة لليوم ..
كانت الساعة 4 العصر و نورة كانت قاعده بالصالة مع عمتها و إلا جرس البيت يرن
قامت الخدامة و فتحت الباب.. و دخلت المرة اللي كانت واقفة عند الباب
سمعوا نورة و عمتها صوتها واهي تقول: السلام عليكم
ردوا عليها: و عليكم السلام
وقفت المرة و اهي تطالع نورة.. "انتي نورة؟"..
نورة: أي نعم أنا نورة..
المرأة: عرفتيني؟
نورة: لا والله.. من تكونين؟
"ما ألومج.. آخر مرة شفتك كان عمرج أقل من سنة و من بعدها إنتقلتوا لمصر و ما سمعنا عنج شي"
قالت و هي تشوف نورة.. عمة نورة كانت مستغربة من كلامها..
سلوى: لو سمحتي ممكن تقولين لنا من انتي؟
"أنا منيرة.. عمة أمج الله يرحمها يا نورة"
سكتت نورة و طالعتها بنظرات تفاجئ
نورة: انتي عمة أمي؟؟
منيرة: أي والله.. و لما عرفت أنج ساكنه اهني.. قلت لازم أشوفج
سلوى: حياج الله في أي وقت
منيرة: الله يحييج
خذت منيرة ايد نورة و اهي تطالعها و اهي فرحانة
منيرة: ماشاءلله عليج.. كبرتي و صرتي مرة..
ضحكت نورة بخجل و نقلب ويها ألوان
منيرة: إنتي بصراحة نسخة من أمج..
نورة: كل من يقول لي هالكلام.. بس أنا أشوف أن أمي كانت أجمل مني بوايد
منيرة: ههههه لا والله الشبه بينكم واضح لدرجة احس ان انتي ساره جدامي
نورة إبتسمت إبتسامة عريضة..
سلوى: حياج إستريحي.. نورة قومي ييبي قهوة بسرعة

قامت نورة بسرعة لداخل المطبخ و اهي ميتة من الوناسة بالكلام اللي سمعته من عمة أمها.. رتبت كل شي في الصينية و شالتها.. توها تبي تحط ريلها بدش الصاله.. بس سمعت حجي خلاها واقفة في بمكانها..!!
منيرة: أنا لما سمعت أن أبو نورة تخلى عنها و يابها عندج.. قلت لازم أجيك عليها و أشوفها المسكينة!
سلوى: أبو نورة ما تخلى عنها.. اهوا يابها عندي لأنه مشغول وااايد في شغله بمصر.. و يابها عندي عشان أحسسها بالحنان اللي ناقصها من أمها..
منيرة: أنا اللي سمعته أنه قرر يرجعها بلدها في هالعمر لأنه ما يعرف كيف يربيها واهي هالكبر
سلوى: سمعتي؟ و من وين سمعتي؟
منيرة: الناس تتكلم و الحيطان تسمع.. و الكلام ينتشر.
سلوى: ما يهم شنو الناس تقول.. أنا متأكدة أن أخوي ما يمكن أن يتخلى عنها.. شلون واهي بنته الوحيدة.؟
منيرة: اهو أنا اللي أبي أتطمن عليه حالة نورة من بعد ما سمعت الخبر.. أنا لما سمعته من جيرانا اللي أختها ساكنه بالشقة اللي مجابلة شقة أخوج.. ما صدقت!
سلوى: أنا ليلحين ما قررت أقولها..
منيرة: و متى مقررة تقولين لها إنشالله! العرس بعد إسبوع و لازم تدري
نورة بدأت نظرات الشكوك على ملامحها.. عرس منو اللي يتكلمون عنه؟
منيرة: أنا اللي معور قلبي هو كلام الناس اللي يقول أن أبوها طرشها بلدها عشان يتزوج و يكون له عايلة يديدة بمصر من دونها.

نورة لما سمعت هالجملة.. كأنها شايفة جن مار من جدامها.. من غير ما تحس طاحت الصينية من ايدها و إنكسروا الفناييل و أنكبت القهوة على الأرض. لما سمعوا صوت طيحة الصينية من ايدها.. أركضت عمتها لتشوف شصار.
سلوى: نورة شصاير ؟
نورة بصوت متقطع و عينها في الأرض: مادري مادري
سلوى: نورة قوليلي شصاير؟
نورة: مو صاير شي.. بروح داري شوي فيني عوار راس..
ركضت نورة لدارها و قفلت الباب و جلست على طرف السرير و هي تبكي
و هذي نفس حالتها اليوم.. حطت نورة راسها على المخده و الدموع ليلحين تنزل من عينها.. صكت عينها و غصبت نفسها أنها تنام عشان تنسى باللي صار و فعلا غطت عينها.

قعدت نورة من النوم لما سمعت طرق عمتها على بابها
سلوى: نورة قومي فتحي الباب.. هدى تبيج على التيلفون
نورة و هي تمسح دموعها: إن شاءالله عمتي
قامت نورة و إنزلت تحت بالصاله وردت على التلفون من هناك
نورة: ألوووو
هدى:هلااااااا والله بنورة
نورة: هلا بيج
هدى: شفيج.. صوتج متغير.. صايرلج شي؟
نورة: لا بس كنت نايمة و توها قومتني عمتي
هدى:باااااااال.. نايمه لهالحزة!
نورة: ليش الساعة جم ألحين؟
هدى: الساعة 7 بتوقيت بيتنا.. هههههه.. تعالي شلون كانت المدرسة؟
نورة: والله مادري شقولج هدوي.. فيها الزين و الشين
هدى: كل المدارس جذي.. أنا و أمل ياتنا لوعة من المنهج.. بس حمد الله البنات حليوين و حتى الابلات
نورة: الحمد الله..
هدى: المهم يا قمر.. أنا لازم أروح أحضر دروسي حق باجر و أنتي سوي نفس الشي
نورة: أنا حضرت قبل ما أنام
هدى: ويييييي.. أشوف الشطارة زايدة
نورة: ههههههه شنسوي بعد.. يلا حبيبتي نشوفج على خير.. سلمي على أمل وايد
هدى: يوصل.. يلا باااااي

سكرت نورة الخط و قلبها مرتاح شوي.. لأن سماعها لصوت هدى ريح بالها..
نورة و هي تفكر: بصراحة نفسيتي تعبانة.. شلون بروح المدرسة باجر.. والله مادري ليش ما أتشجع أقول لهدى اللي في قلبي.. اهي أقرب مني فهما و سنا.. والله خاطري أقول لها بس أحسها ما راح تفهم.. ولا أحد يقدر يفهمني.. أحس نفسي وحيدة حتى لو عندي من يحبني حوليني.. يا رب سهل علي الأمور يااارب..ونزلت دمعتها على

رجعت نورة غرفتها و خذت صورة أمها وحطتها تحت المخده.. و ردت نامت عشان تكون قادرة تقوم و نفسيتها أحسن للمدرسة..
مرة وحدة يات على بالها مريم.. تلك اللي تطالعها بنظرات غريبة.
نورة: أنا ليش أفكر فيها..؟ بس نظراتها غريبة لي و موقادرة أنساها و ودي أعرف شنو قصدها هالبنيه..!! و أنا أول ما شفتها أستغربت أن في بنت ترضى بأن يشوفها الناس بهالشكل..بعرف شلون ترضى تتخلى عن كامل أنوثتها! راح أسأل العنود باجر و ان شاءلله أحصل أجوبة أسألتي من عندها..
طفت نورة الليت و نامت و بكرة يوم جديد في المدرسة.


يتبــع مع الفــصل الــرابع: البــدايـة مــع مـريــم

الفصل الرابع: البداية مع مريم

فتحت نورة عينها و إلا الشمس القوية تدخل في عينها و حست كأنها إنعمت.. قامت و قعدت في مكانها و اهي تمسح عينها.. طالعت الساعة اللي عاللطاولة اللي صوب السرير.. الساعة 7!!!!ماباقي شي وتصير ونص .!!

فتحت عينها على الآخر و نقزت داخل الحمام.. سوت كل شي اللي سوته أمس بس كأنه شريط فيديو على "الفورورد"
سلوى و اهي تصرخ عند الدري: نورة.. نورة السايق ناطرج من ساعة!! ويييييينج!
نورة و اهي تركض على الدري: أكاني يايـــــــــ...
و قبل ما تخلص جملتها ريلها إنعويت و طاحت 4 درجات..
سلوى: وي بسم الله عليج.. قلنا الوقت متأخر بس لا تسوين جذي بروحج.
نورة قامت و رتبت روحها اللي تبهدلت من بعد الطيحة..
نورة: أنا ما أحب التأخير.. كلش ما أحب يكون شي في حياتي مو منظم
سلوى: مو شرط كل شي في الحياة يمر على كيفج..! المهم بسرعة راح تتأخرين مووقته هالحجي

ركبت نورة السيارة و اهي تعري من الطيحة و بكل سرعة لمت شعرها اللي ما مشطته من قومتها..
نورة نفسيتها كانت ليلحين تعبانة.. السالفة اللي صارت قبل يومين أثرت عليها..
أسرارها و أفكارها دايما لنفسها.. و عمرها ما قالتهم لأحد..
اهي من قبل يومين حلفت أن ما راح تبجي أو تبين حزنها حق احد..
بس من بعد ما شافت صورة أمها.. حست بوحشتها..
فهي محتاجة لها أكثر من أي شي في هالوقت.. و من بعد ما عرفت أن أبوها راح يتزوج من مرة غير أمها.. حست أن الدنيا ظالمة بعينها.


وقفت السيارة يم باب المدرسة.. كانت الساعة 7 :40..
نورة: تأخرت وايد.. راح أنزف..
ركضت نورة لصفها و قلبها يرقع من الخوف.. اهي مو من عوايدها أنها تتأخر..
وقفت نورة عند باب صفها و قامت طلت عشان تشوف من اللي كان عندهم..
و المفاجئة اللي خلت نورة تحس ببرود في جسمها كله
الابله اللي كانت عندهم اهي ابلى اللغة العربية.. وداد..!!!
اللي لها موقف مع نورة من قبل

قامت الابله من مكانها و مشت صوب نورة..
و من الخوف تجمدت نورة في مكانها!..
وداد: يعني لازم تكونين آخر وحدة في الصف توصل..
نزلت راسها نورة و توها تبي تقول شي..ابـلـ....
وداد و اهي تقاطع نورة بصراخ: يعني لازم أنا أيلج عندج يم الباب و أعطيج دعوة داخل عشان تدخلين الصف..؟؟!! خلاص انتي خذيت عنج فكرة مو زينة..
نورة: لا والله..
وداد بحمق: بآآآس ولا كلمة..!الحين تروحين عند المشرفة .. و ماراح ادخلج الصف إلا بعذر من عندها فاهمه..؟ و هذي مو كل شي.. راح أعطيها إنذار عنج أن إنتي من النوع اللي يحب التأخير انزين يا آنسه نوره.. يلا جدامي روحي المشرفه يلااا..
رفعت نورة راسها و كل اللي تشوفه وجوه البنات و نظراتهم و هم يطالعونها من داخل الصف..
مشت نورة من عند المعلمة و قلبها متروس.. ما عرفت شتسوي..
لان عمرها مادلت وين مكتب المشرفه
و صراخ الابله لها خلاها تحس بالحزن أكثر من قبل..
مشت بروحها في ممرات المدرسة و اهي لامة يدها و ويها كئيب ماتدري وين تروح..
ليما وصلت عند للصالة البدنيه بالمدرسة..

من غير إحساس دخلت داخل و مرت من غير ما تشوف يمين ولا يسار..
الصالة كانت خالية.. ما كان فيها إلا مريم بروحها تلعب بالكورة و تنقزها على ريلها..عشان عندها مبارات بعد جم يوم
و لما شافت نورة وقفت لعب !! بس انصدمت من الحزن الي مبين عليها.. ووقفت تطالعها ان ليش داشه اهني ..؟!
دخلت نورة غرفة التبديل للصالة و اهي ما تدري أن مريم شافتها ولا شافت احد اصلا..
الفضول كان ذابح مريم.. كانت تبي تعرف شفيها نورة ليش داشه الصاله؟ .. وليش كل هالحزن على ويها شصايرلها..؟! ..و قامت لحقتها..
دخلت مريم غرفة التبديل إلا تشوف أن مافي أثر لنورة..!!!!
إستغربت.. إلا تسمع صوت بجي خفيف من داخل غرفه من غرف التبديل اللي في الغرفة طبعا
نورة كانت تبجي لأنها حاسة الدنيا أنصكت في ويها وماتقدر تتحمل..
عمرها محد صرخ بويها بهالطريقة لأن طول حياتها ما غلطت في شي أن يخلي أحد زعلان منها أو مستاء.
نورة تبجي و اهي ما تدري أن مريم واقفة برا عند باب الغرفه اللي هي قافلة على روحها فيها.. تسمعها و هي تبجي..

مريم سوت روحها ما تدري أن نورة اهي اللي بالداخل
مريم: منو داخل..؟
نورة مرة وحدة لما سمعت صوت أحد يكلمها وقفت بجي..
بس ما ردت على مريم. وتمت ساكته..
مريم: أنا سمعت صوتج و إنتي تبجين فسكوتج ما راح يفيد..
نورة قعدت تفكر للحظة.. "وين سمعت أنا هالصوت من قبل؟؟!"
مريم: يعني ما راح تبقين داخل على طول.. خلصينا بطلي
مرة وحدة إستوعبت نورة.. الصوت الخشن.. طريقة الكلام.. الضحكة المصطنعة!
اللي قاعدة تكلمها معقوله اهي مريم.؟!
"امبييه رحت فيها.. مريم سمعتني أبجي....امبيه شسوي ما أقدر أسكت و هي صاجة ما أقدر أتم على طول داخل .."
مريم: يعني راح تتكلمي.. ولا هاا؟ .. ترا اشقحلج من فوق!
نورة و هي منصدمة من جملة مريم: لا لا لا.. راح أتكلم!!!
مريم: الحمد الله.. ظنيت أنج إنتحرتي من بعد ما راح صوتج
نورة: واهي تبطل الباب شنو؟ إنتحرت!!!!؟؟
مريم:اي الحمامات اهي المكان المثالي للإنتحار في المدرسة.. يعني وين راح تختارين غيره.. الإدارة مثلا.. ههههه
نورة و هي مو مصدقة شنو قاعدة تقوله مريم: أنا عمري ما فكرت بهالشي و الله يبعدني عنه لأنه تذكرة سريعة لنار جهنم..
مريم: هههههه بسج تفلسف ادري ان ماعندج سالفه..
نورة: و انتي شعرفج فيني.. انتي ما تعرفيني شلون تدرين ان ماعندي سالفه
مريم: بس أعرف أن في شي مضايقج.. قوليلي يمكن أقدر أساعدج..
سكتت نورة شوي و مخها كان مشوش.. كيف تثق في وحدة مثل مريم..
تمت نورة ساكته و ما ردت على مريم..
مريم:اممم على راحتج.. و كانت توها راح تمشي برا غرف التبديل..
إلا تسمع صوتها نوره : لحظاااااااااا..
وقفت في مكانها و إبتسامة على وجها و إلتفتت عليها..
كانت نورة واقفة في مكانها وملامحها حيل حزين و شاحبه تناظر مريم من بعيد..
مشت مريم لعند نورة و طلعت طلينكس من مخباتها..
كانت نورة تطالع الأرض.. ما كانت قادرة تطالع مريم في عينها..
لأن وجها و ملامحها بالكامل و حتى عطرها .. ما فيها أثر للأنوثة.. فحست نورة أنها واقفة جدام صبي.. بس في نفس الوقت كان عقلها يقولها أن اللي جدامها معقوله بنت .!!

خذت مريم الكلينكس و مسحت آخر دمعة نزلت من عين نورة.. رفعت نورة راسها تطالع مريم و اهي تفكر: ليش تعمل كل هذا مريم!!
مريم: شكلج و إنتي تبجين.....
نورة: شنو شفيه؟؟؟!
مريم حدااااا: كريييييييييييييييه!!
طلعت نورة ضحكة صغيرة من غير ما تحس.. أول مرة تسمع هالكلام من أحد
مريم: الللله أي جذي ويهج أحلى.. وجهج في الأصل حلو وايد حلاتج موحلوه ملامحج وانتي تبجين!!!
وجه نورة صار لونه أحمر.. ماروني بالأصح! كأن الكلام اللي سمعته كان من صبي! هاذا اللي حسته ذيج اللحظة.
تغيرت ملامح وجه نورة لما سمعت الجرس.. لأنها إذا تأخرت على ثاني حصة بعد.. ما راح تسامح نفسها.. مسحت كل دموعها بسرعة و طالعت مريم و هي مبتسمة
نورة: شكرا على الكلينكس.. لازم أمشي ألحين
و طلعت نورة برا غرفة التبديل و اهي تمشي بسرعة.. بس مريم نطت جدامها و وقفتها..
مريم: لحظه لحظه وين..؟! نطري شوي.. خليني أوصلج لصفج.. ما أقدر أخليج بهالحالة بروحج
نورة: لا مو مشكــــــ..
قبل ما تخلص نورة من جملتها سكتت لأنها شافت بنت برونزية و شعرها أسود و طويل و ملامحها جميلة حييل..

كانت هالبنت اهي نفسها وحده من الثنتين اللي كانت تلمها مريم بالأمس وقت الطابور.. واقفة جدامها و تطالع مريم بنظرات.. ما قدرت تفسرها..
وقفت مريم تطالع البنت و هي مرتبكة
مريم: شوق!.. وينج ما بيتني اليوم؟
نورة واقفة في مكانها و هي تقول لنفسها.. "البنت إسمها شوق..!!"
مريم طالعت نورة بس في نفس الوقت إلتفتت على شوق إلا تشوفها متكتفة و تمشي برا
مريم و اهي تركض ورى شوق: نطري شوق شوووق ياشووق.. لحظة
نورة إستغربت ليش تزعل شوق من مريم بسبب شوفتها لها تكلمها.. شنو السبب!
نورة: أنا ما أحب التدخل في شئوون غيري.. أحسن أسكت و أروح على الصف.
مشت نورة للصف و اهي مو قادرة تنسى اللي صار تو.. و الكلام اللي قالت لها مريم
بس في نفس الوقت كانت مرتاحة.. لأن اللي صار خفف عن حزنها.. و ما عندها تفسير ليش اللي صار خفف عن ألمها اللي كانت تحس عمره ما راح يتركها .


انتظرونا في الحلقة القادمة مع

الفصل الخامس:

معلومات دقيقة

يسلمو عالبارت كملي .......

معليش يابنات بعد اسبوع انزل البارت الخامس

شاآمخ بعزهـ كتب:

اذا تبون انا بنزل لكم البارت الخامس بدالها

بس وقصم النهايه مب حلوهـ وحززينه

أي بليز نزلي ......
عادي أهم شيء انعرف النهاية لأني إذا قريت روايه لإزم أعرف نهايتها بيذبحني الفضول

تفضلوا الجزء الخامس:

الفصل الخامس: معلومات دقيقة

وصلت نورة لعند صفها.. ولما دخلت بنات الصف سكتوا و قعدوا يطالعونها..
حست نورة بعدم الإرتياح بسبب نظرات البنات لها.
"بصراحة زين سويتي في معلمة وداد!"
قالت وحدة من البنات لنورة و هي تطالعها بنظرات إعجاب
نورة سكتت و هي تتلفت و تطالع وجوه البنات اللي كلهم مبتسمين لها
"أي والله.. لو أنا مكانك أخاف منها و أركض للمشرفة و أجيب لها عذر"
قالت بنت ثانية لنورة.. "حتى أنا" ردت عليها بنت ثالثة
و كانوا تقريبا كل بنات الصف ملتمين على نورة.. يكلمونها كلهم في نفس الوقت و هم فرحانين.
نورة ما كانت تعرف كيف تتصرف في هالموقف.. تستانس للكانت تسمعه؟ أو تسكت لأنها تدري أن مافي داعي لكل هالإعجاب من البنات؟
اللي أنقذها من الموقف هو دخول معلمة الكيمياء.. كل البنات ردوا أماكنهم بسرعة..
ردت نورة مكانها.. و مرة وحدة حست بالدفء..
اللي كانت تفكر فيه أن لما كانت تدرس في مصر.. ما قد مرة صادها موقف خلها تحس بأنها مهمة.. و بأن أشخاص عددهم كبير حابين يتكلموا معاها و يسمعوها..
هذا الشي بعث شوي من الفرحة في قلبها.

إبتسمت نورة إبتسامة عريضة لما شافت أقرب وحدة لها في المدرسة.. العنود طبعا
نورة قررت أن ما تقول لأحد باللي صار مع مريم اليوم و لا حتى للعنود
حتى لو طول ما هي كانت معاها في الفسحة حست بأن خاطرها تقولها..
بس الخوف من ردة فعلها للموضوع و طول الموضوع غير رايها
نورة و العنود كانوا يتمشون في أحدى ممرات المدرسة
ولما وصلوا بجنب الصالة الرياضية.. قامت نورة من غير إحساس و طلت داخل الصالة
و كأن قلبها كان يهمس لها أن تطل و تشوف إذا مريم بالداخل

العنود وقفت تطالع نورة و هي مستغربة..
العنود: تدورين عن أحد؟
نورة و هي تحرك راسها يمين و يسار: لا.. بس حبيت أشوف شنو داخل الصالة
العنود بإستهزاء: يعني شنو بكون داخل الصالة.. أدوات رياضة و بنات يلعبون بالكور
نورة: أههههه.. لا بس حبيت أشوف إذا الصالة مختلفة عن الصالة الرياضية اللي كنت أشوفها في مصر.
العنود: إنت قلتي لي أن هذي أول سنة لك في البلد بس عمرك ما جبتي طاري وين كنتي تعيشين.. في مصر يعني؟
نورة: أي في مصر..
العنود: أهااا.. أحس العالم هناك غير عن هنا
نورة و فيها الضحكة: ليش يعني؟؟!
العنود: لأنك أنتي طلعتي مادري شلون.. غير
نورة: أنا غير؟؟!! والله لا
العنود: لا تحلفي بإسم الله.. أنتي ما تعرفي ولا شي عن اللي يصيير في مدرستنا.. من هالسبب أنا خايفة عليك..
نورة: أي صج أنتي ما قلتي لي.. شنو هي السوالف الخطيرة اللي كنتي تتكلمين عنها بالأمس؟؟! أنا ما فهمت قصدك!
العنود و هي تحط يدها على كتف نورة: أنا راح أفهمك أحين
و خلت نورة تدخل الصالة..
وقفوا هي و العنود في مكانهم و كانوا جدامهم بنات من بينهم مريم..
كانوا لابسين ملابس رياضية فضفاضة و في مبارة كرة سلة.. و كلهم أشكالهم توحي بأنهم أولاد
و البنات الباقيين كانوا جالسين على الكراسي يشجعون..

العنود: أنزين.. شوفي البنات اللي قاعدين يلعبون بكورة السلة
نورة تطالعهم و لمحت مريم من بينهم.. و هي ما فاهمة قصد العنود: أي.. شفيهم؟!
العنود: شنو يوحيلك شكلهم؟
نورة: ما أدري.. يمكن شوي أشكالهم دفشة.. بس
العنود: شوي؟؟؟!!! هاااهاااي
نورة: ليش شصاير؟!!
العنود: هالبنات لا تجربين منهم إلا إذا كان أمر عاجل يخص دراستك و هالشي نادر
نورة و هي منصدمة: ليش؟؟! ما فهمت.. شفيهم؟؟!
العنود: هالبنات يسمونهم بإسم "البويات"
نورة: بويات.. يعني شنو؟
العنود: يعني بنت شكلها و حركاتها و كل شي فيها مثل الأولاد
نورة: يعني مسترجلة.. أي أنا أدري أن هم أشكالهم مسترجلين.. بس ما فاهمة ليش تخافين علي منهم؟!
العنود: الكلام اللي بقولك أياه كل المدرسة تعرفه.. هالبنات سمعت عنهم أشياء تخلي الواحد يخاف منهم.. فالكل يعاملهم كأنهم أولاد. أو رجال!.. و في بنات تسمعينهم يقولون لا هم بنات نفسنا بس وقت اللي تجرب منهم كل شي يتغير و البعض الآخر مثلي يكرهم كره ما له حدود!!
نورة: بس أنا ما أحب أن أحكم على الكتاب من غلافه
العنود: أحنا ما قاعدين نتكلم عن كتاب تبطلينه و تصكينه أي وقت تبين.. أحنا قاعدين نتكلم عن بنات يحسبون نفسهم أولاد و يعاملون غيرهم على أساس أنهم أولاد!
نورة: بدال هالكره اللي في قلبك.. عامليهم بلطف و كرم على أساس أنهم بشر و أنسي أي شي آخر!

العنود ما عجبها رد نورة على الموضوع.. فهي ما تدري أن نورة في الحقيقة قاعدة تدافع عن حق هالبنات بسبب أنها إلتقت بمريم اليوم و حستها طيبة.
العنود: أنا ما راح أرد عليك لأنك جديدة على السالفة.. بس نصيحة من وحدة تحبك.. لا تجربين تعملين صداقات معاهم لو شنو صاروا أوكي معاك.. لأنهم ما راح ينفعونك في شي!
مشت العنود و خلت نورة واقفة في محلها بروحها.. نورة ما صدقت أن العنود زعلت منها بسبب هالموضوع.. فهي ما تقدر تكره مريم من بعد الموقف اللي صار لها الحصة الأولى.

رن جرس نهاية الفسحة و وقفوا البنات و مريم المباراة.. نورة بس وقفت مكانها تطالع كل حركة تعملها مريم و هي هالشي عمرها ما سوته.. أنها توقف في محلها بس عشان تشوف ما يسويه غيرها.. فهالشي مالها دخل فيه.
مشت مريم لعند شوق و جلست بجنبها.. كان مبين على شوق أنها ليلحين مستاءة من مريم.. و نورة فيها نوع من الفضول.. قعدت تفكر باللي قالته العنود.. أن هالبنات يحسبون نفسهم أولاد و الناس تعاملهم بأساس أنهم أولاد..
و مرة وحدة حست كأن مصباح نور فوق راسها.
لو بنت شافت ولد قريب لها يكلم بنت غيرها راح أكيد تحس بالغيرة و مريم هي كالولد و لما شافتني شوق معاها غارت و زعلت!!
نورة: هذي أكيد اللي صار.. بس كيف تغير عليها و هم بنات.. يا ربي ما فاهمة!

كانت مريم تكلم شوق و هي ماسكة إيدها و كأنها تترجى رضاها..
نورة جاها إحساس غريب.. و كأن موقفها بالنسبة لشوق موقف كره.. لأنها خلت مريم تترجاها عشان ترضى عليها.. لأول مرة تحس نورة بأن عيونها أنفتحت أكثر من قبل.. لأنها بدأت تشوف حياة غيرها.
بس سرعان ما إستوعبت وين هي مكانها في السالفة و هي بالأصل ما لها مكان في السالفة.. فقامت طلعت من الصالة و مشت للصف.

مشت الحصص بسرعة و نورة كانت تكتب في دفترها مقتطفات من شرح المعلمات بس ما كانت تفهم ولا شي من كلامهم.. اللي كان ماخذ بالها هو زعل العنود عليها و كيف راح تكون لما تشوفها بعد ما يرن جرس الهدة. كانت تحس برجفة في إيدها..
رن جرس الهدة و كانت نورة على أمل أن العنود راح تجيها جنب باب صفهم مثل ما عملت اليوم اللي قبله.
لمت نورة أغراضها و إنتظرت قدوم العنود.. بس بعد ما صار لها عشر دقايق جالسة في الصف بروحها.. قامت من مكانها و مشت بروحها في وسط الساحة و هي مشاهدة الأرض.

مرة وحدة تسمع صوت مريم تصرخ من بعييييد..
"أووووووووووووقفي"
إلتفتت نورة و إلا مريم تركض بسرعة لها من أول الساحة.
وصلت مريم عندها و هي شوي تنافخ من التعب.
نورة طالعت مريم بنظرة إستياء.. لأنها لما شافتها تذكرت أن هي السبب اللي خلاها تتزاعل مع العنود.
مريم و هي تضحك: شفيك تطالعيني بهالنظرة؟
نورة ما ردت عليها بس مشت من عندها..
مريم: لحظة هيييي.. شسويت أنا؟!
نورة: ولا شي.. بس حابة أمشي بروحي.. يعني إذا ما عليك أمر!
مريم: بييييييييه! مسامحة بس ما كنت أدري.. شكلك وايد مشاكل عندك.. صار لي يومين بس أشوفك و ولا مرة شفتك فيها كنتي مبتسمة أو فرحانة!
نورة حست بإختناق بسبب كلام مريم.. و أول مرة تحس بأنها خاطرها تكفخ أحد!

و في هاللحظة حست نورة أن لازم تطلع اللي في قلبها ولا راح تنفجر!
نورة بحمق: أبتسم!!.. أبتسم و الدنيا مظلمة! أبتسم و أنا ما لي أحد أثق فيه أو على الأقل أحد يسمع رايي في كل شي أو يتقبله.. والله أنا من أول ما جيت لهالبلد و أنا حاسة أن المشاكل راح تااكلني!

مريم إنصدمت من كلام نورة.. ما توقعت أن وراء كل حزنها و بكائها سبب يجرحها و يخليها تعصب لهالحد.. و ما توقعت وراء كل هالنعومة و الخجل.. بنت خاينها القدر و متعبتها الدنيا..
مريم: أنا آسفة .. ما كان قصدي.. بس حبيت أقول لك أن أسمي مريم و أن إذا أحتجتي أي شي مثل اليوم الصبح.. أنا حاضرة لك.. بس شكلك ما تحتاجين أحد يساعدك.
مشت مريم من عند نورة و هي منزلة راسها.. لأن حست بإنحراج من ردة فعل نورة.
نورة وقفت تطالع مريم و حست بالذنب.. ما كان لازم تطلع حرتها بمريم..
نورة: لحظة مريم.. ما كان قصدي أزعلك.. كفاية اللي زعلته غيرك اليوم.. و أنا ما أقدر أنام الليل و أنا مزعلة شخص ثاني عزيز علي..
مريم إلتفتت على نورة و هي مستغربة: عزيز عليك؟ يعني أنا شخص عزيز عليك؟ أنتي حتى ما تعرفيني! كيف صرت عزيزة عليك؟؟!

نورة: اللي سويتيه اليوم مو شي يسويه لي شخص كل يوم..
مريم إبتسمت إبتسامة عريضة.. و راحت لعند نورة و ضمتها بقوة!!..
نورة فتحت عينها عالآخر ما توقعت هالشي من عند مريم!
تركتها مريم و خذت يدها و سحبتها و هي تقول: لازم أعرفك على الربع يـــــــ؟؟ ما قلت لي أسمك! شنو هو؟؟
نورة سكتت و وقفت في مكانها و الصدمة على وجها.. أي ربع تبي تعرفني عليهم!
نورة: أسمي نورة.. و لازم أمشي أحين و الوقت تأخر و السايق ناطرني من ساعة
مريم: أفااااااا.. بس نشوفك بكرة.. راح أشتاق لك..
نورة ما عرفت شنو ترد على مريم.. من غير ما تحس قالت..
"و أنا بعد!"
و مشت من عند مريم بسرعة هادتها بإبتسامة أكبر منها مافي من بعد ما فسرت كلام نورة لشي ثاني! بس نورة ما تدري شنو هو تفسيرها طبعا!

الفصل السادس: دوامة أعصاب

ركبت نورة السيارة بسرعة و حاسة بالصدمة بس هدأت من نفسها شوي..
تمت طول الطريق ساكتة و هي مركزة و تهز رجلها..
إستوعبت و ردت للدنيا لما وقفت السيارة بجنب البيت.. طالعت نورة يمين و شمال و
بعدين نزلت من عند السيارة و دخلت البيت.

فتحت نورة الباب و بسرعة ركضت فوق غرفتها و ردت الباب من وراها..
عمتها طلت من المطبخ لأنها سمعت صوت نورة و هي تدخل البيت.. بس إستغربت ليش ما
يات و سلمت عليها
قررت أنها تركب لها فوق.. وقفت سلوى عند باب نورة و طقت عليها طقتين
سلوى: نورة.. نورة انتي هنا؟
كانت نورة ساكتة و ما ترد عليها..
سلوى قامت تطق على باب مرة ثانية..
سلوى: نورة!
نورة فتحت الباب و وقفت تطالع عمتها ناطرتها تقول اللي عندها
سلوى: ما تبين غداك؟؟
نورة: مو جوعانة.. حطيه لعقب..
توها نورة بترد الباب بس عمتها دزته و خلته مكانه مبطل
سلوى: أمس قلتي نفس الكلام.. و أنا كنت ناطرتك تجين و تاكلين بس ولا حتى شفتك من بعد مكالمتك مع هدى!!
نورة بحمق: يعني ما يصيير تغصبين أحد أنه ياكل إذا هو ما يريد!
سلوى ما صدقت اللي سمعته.. هذي أول مرة في ال3 الأشهر اللي تعرف نورة فيها ترد
عليها بهالطريقة.
سلوى بحمق: يعني ما راح تاكلي.. معليش.. ليش أعور قلبي! ما قول إلا جزاة الخير سواد
الويه!
و مشت عن باب نورة.. توها بتحط رجلها على عتبة الدرج إلا تسمع نورة ترد عليها.
نورة: أي خير! قولي لي.. أنتي ما تقصرين معاي بشي.. بس لأنك مطرة تعملين كل هالأشياء
لي.. مب حبا لي!
عمة نورة إلتفتت على نورة إلا تشوف عينها تدمع
سلوى: و مين قال إن كل اللي أعمله شي مطرة أعمله! ليش خذيتي هالفكرة عني؟! أنا
شسويت؟
نورة و هي تبكي: و أنا شسويت عشان يتخلى عني أبوي!
سلوى مشت لعند نورة.. "مين قال أن أبوك تخلى عنك.. هو يحبك!"

لما سمعت نورة جملة "أبوك يحبك" حست كأن سهم دخل قلبها..
و الألم بمعرفتها عن زواج أبوها رجع مرة وحدة كأنه صرخة قوية توجع الراس!
وقفت ساكتة في مكانها و عمتها تطالعها و هي مستغربة.. شاللي خلها توقف عن البجي!!
سلوى: نورة؟؟!
نورة: أنا راسي يعورني و أحسه بينفجر! و لازم أنام و إذا ما نمت راح أموت!
سلوى: نورة شفيك حبيبتي؟؟! شنو غيرك مرة وحدة و خلاك حزينة!؟؟
نورة: ولا شي.. بس ضغوط الدراسة مأثرة علي.. عن أذنك..
دخلت نورة داخل غرفتها و ردت الباب
عمتها بس وقفت عند الباب و هي ما عاجها الوضع اللي نورة فيه و الفكرة اللي هي ماخذة
عنها.. وقالت لنفسها: لازم أعمل شي يريح بالها!

كانت نورة غرقانة في النوم.. فالمشاكل اللي تعانيها ما ينعدون!
شجارها مع العنود و كل اللي صار بينها و بين عمتها أثر عليها و نساها سالفة مريم طبعا.
مرة وحدة حست بشي سنين يمشي على وجها.. كان إحساس ينرفز!
و هي نايمة و من غير ما تحس ضربت الشي بيدها..
بس ردت حست بنفس الشي بس هالمرة كان في إذنها.
و إلا مرة تقوم من النوم و تجلس في مكانها وهي فاتحة عين وحدة بس.. و ما تشوف إلا
بنتين واقفين جدامها..
ما لاحظت من هم بس سمعت ضحكات خفيفة. و لما فتحت عيونها إلا تشوف هدى و أمل
واقفين جدامها و هم شاقين الحلج و في يد هدى قلم رصاص شكله هو الشي اللي كان
منرفز نورة
نورة بصوت تعبان: هدى..؟؟ أمل..؟؟
ثنتينهم ردوا عليها أييييييي و هم يتضحكون

نورة حست بفرح غير طبيعي لما شافتهم
قامت من مكانها و لمتهم و هي مو مصدقة أنهم زايرينها هالحزة و في يوم دراسي.
نورة: ما تدرون أنا شقد فرحانة بشوفتكم!
أمل: أحنا أكثر يا نوري! وحشتينا!!
هدى: والله أنتي غبية دخلتي مسار العلمي.. عزبالك شاطرة وايد!
نورة: ههههه.. لا بس أدري أني أذكى منكم و ما حبيت أنافسكم في نفس المجال!
هدى: وووووووووووه!!! ما قول إلا فلحتي بهالغرور اللي فيك!
أمل و هي تشوف ساعتها: تأخرنا.. يلا نورة قومي تبرزي بسرعة
نورة و هي مستغربة من الكلام اللي أمل قاعدة توجه لها: ليش؟!! وين بنروح؟!!
هدى: كيف ما تدرين و عمتك هي اللي أتصلت فينا و أقترحت علينا الموضوع!
نورة: أي موضوع! و متى كلمتوا عمتي؟!!
أمل: عمتك إتصلت فينا و خبرتنا أن عندك شوية مشاكل مع المنهج فـــ..
هدى و هي تكمل على كلام أمل: إقترحت أن نروح دروس خصوصية عند إستاذ في المعهد
الجديد اللي فتحوه جنب مدرستنا أنا و أمل.
نورة: معهد! ليش نروح معهد إذا نروح المدرسة!
هدى: عشان نخرطها في المدرسة و نتعلم بطريقة مبسطة أكثر في المعهد طبعا!
أمل: ههههههههه.. و مين قال إن ما نخرطها في المعهد بعد!
هدى: أي والله و إنتي الصاجة.. بس هالسنة راح نعقل لأن نورة معانا.. يلا قووووومي يا
نورة بعد أقل من 10 دقايق الدرس!
نورة: لحظة أنا أصلا مجالي غير عن مجالكم! يعني دروسنا غير
أمل: لا يا حلوة.. المواد اللي سجلناها مثل العربي و الإنجليزي كل المجالات ياخذونها.. يلا
قومي يلااا!

لبست نورة عبايتها اللي أشترتها لها عمتها أول ما جات من مصر.. كانت مطرزة بخيوط
ذهبية على منطقة الظهر و قليل على اليدين.. و قامت و ربطت شعرها بربطة بنفس لون
الخيوط اللي في العباية.. و خذت معاها قلم و دفتر و نزلت تحت مع هدى و أمل.

طلعوا هدى و أمل برع البيت.. إلا نورة وقفت في مكانها تشوف عمتها و هي ماعطتها
ظهرها و كان المصحف بين يدها و تقراه.. حست نورة بالذنب لما قالت لعمتها أنها ما
تحبها.. فاللي سوته عشانها أحين بين لها أنها حقا تحبها و خايفة على مصلحتها.
مشت نورة و ركبت السيارة مع أمل و هدى.

وصلوا البنات عند المعهد.. نزلوا من السيارة و كان عند الباب كثير أولاد متجمعين..
هدى: من الأشكال اللي تدرس في هالمعهد أنا مو مرتاحة
أمل: ههههه.. أي والله
نورة دخلت المعهد مع أمل و هدى و هي منزلة راسها
لأن الأولاد اللي كانوا واقفين ما تم نغزة ما قطوها!
هدى: لازم نسأل المرأة اللي هناك في أي صف قاعد مدرسنا الخاص؟
هدى قامت و مشت عند المرأة اللي تشتغل في إستقبال المعهد
هدى: السلام عليكم
المرأة: و عليكم السلام.. كيف أساعدكم؟
هدى: والله أحنا سجلنا لدرس خصوصي بإسم..
و إستمرت هدى تناقش المرأة عن درسهم بس نورة كان تركيزها بعيد عنهم..
لأنها إلمحت ولد شكله يدرس في المرحلة الجامعية واقف عند الباب..
كان طويل و حنطاوي.. لابس الثوب و الشماغ.. و كان الصراحة شكله يهبل
كان واقف يناظرها من بعيد و هي من دون ما تحس بادلته النظرات
بس الشي اللي خلاها تبعد نظرها عنه هو دخول مريم لداخل المعهد!!!
في هالحزة نورة لفت وجها أسرع ما يمكن عشان مريم ما تشوفها و تعرفها
نورة بصوت مرتبك: يلا هدى راح نتأخر.. يلا بسرعة
هدى و هي مستغربة من حالة نورة: أنشالله شفيك مستعلجة
نورة: لا بس راح نتأخر!!!

انتظرو الجزء السابع

شاآمخ بعزهـ كتب:

عذبني بعدك كتب:

شاآمخ بعزهـ كتب:

اذا تبون انا بنزل لكم البارت الخامس بدالها

بس وقصم النهايه مب حلوهـ وحززينه

أي بليز نزلي ......
عادي أهم شيء انعرف النهاية لأني إذا قريت روايه لإزم أعرف نهايتها بيذبحني الفضول

بص اخاف تزعل صاحبه الروايه

بترجع بعد اسبوع وبتنفج اذا لقت روايتها كامله

انتي روحي لقوقل وصوي روايه البويه مريم والبريئه نوره وبتلقينها كامله

أها يعني إنتئ ما كلمتيها أنا على بالي عندها خبر .....
عالعموم أهي نزلت بارت ......

ألبارت حلو تحمسات للبارت الجائ
ننتضرج

البرئه = البريئه

رد: قصة البويه (مريم) والبريئه (نوره) ... قصه جد جد عوآآآر قـلللب .!!!


برع في الحفل و في الزحمة.. كانت مريم واقفة مع شوق
مريم كانت لابسة جينز ديرتي باللون الأخضر.. مع قميص أخضر و عليه جاكيت أسود و
كانت مسرحة شعرها بالجيل. شوق كانت لابسة فستان أسود قصيــر و عليه جاكيت جينز
ضيج.. و كانت عاملة شعرها فير
شوق كانت تسولف مع بنتين و مريم بس كانت واقفة في مكانها و ما معطاتهم أي إنتباه..
كانت ناطرة لما نورة تجي.
مرة وحدة شوق سكتت و إلتفتت على مريم
شوق و هي تضحك: مريم إنتي كنتي معاي لما صارت السالفة.. قولي لهم كيف كنت خايفة!
مريم سكتت تطالع البنتين و هم ناطرينها تتكلم.. كانت ضايعة في السالفة و ما كانت تعرف
شنو اللي كانت تتكلم شوق عنه للبنتين!
مريم و هي تركب أي كلام: أهههه.. كانت.. ميتة من الخوف!
شوق و هي تكمل السالفة: أيــــــي!.. و قعدت أصيح..
إلتفتت مريم إلا تشوف نورة و هي توها خارجة من حمام الضيوف مع فاطمة
مريم: شوق أبي سمر في شي بسيط.. راح أرجع

قامت مريم من عند شوق و مشت لعند نورة
وقفت جدامها تناظرها و كان راس نورة منزل تطالع الأرض
و لما رفعته إستغربت مريم كيف شكل نورة مختلف بالمكياج
عيونها السودة كان شكلها روعة بالكحل الأسود الغامج و شفايفها ناعمين بالحمرة الوردية
الفاتحة.
مريم: واااااااااو!! الستايل رووعة!
نورة قعدت تضحك
مريم: ما تدرين شلون أنا فرحانة لأنك جيتي!!
نورة: حتى أنا فرحانة.. تدرين هذي أول حفلة أجيها في البلد!
مريم: صج

سكتت مريم لأنها سمعت الأغنية تتغير لأغنية رقص rap و كانت تدري شنو راح يصيير.
سمر: حمووووود تعال بـــســــرعــــة!!
نورة: من حمود؟! في ولد هنا؟!
مريم و هي تضحك: أنا حموود.. ههههه
سمر وهي تصرخ: حمووووووووود!
مريم: يووووووه!.. بخليك دقيقة و راح أرجع.. أوكي؟
نورة: أوكي

وقفت نورة في مكانها إلا تشوف كل البنات يتجمعون و هم يصارخون
قالت نورة لازم تشوف شصاير.. مرت نورة من بين البنات عشان تشوف على شنو كانوا
متجمعين..
إلا تشوف بنات يرقصون رقص break dance على الأغنية
كانت سمر من بين البنات و مريم كانت واقفة على جنب
سمر قامت و وقفت على يدينها و قاموا البنات يصرخون لها
دخلت مريم في الوسط و قامت عملت شقلبة على ورا و البنات كلهم يصرخون لها
نورة كانت تطالع بدهشة.. كيف مريم و سمر يقدرون يرقصون بهالطريقة!!
هي شافت في مصر هالنوع من الرقص لكن كانوا أولاد اللي يرقصوا!
مرة وحدة تدخل شوق في الوسط لعند مريم و تلصق فيها و ترقص بس رق
نورة تطالع شوق و كيف كانت ترقص مع مريم و هي تفكر: كيف ترقص كذا جدام هالقد
بنات!!!
كانوا ربع مريم هيفاء و حصة واقفين جنب نورة
هيفاء و هي تكلم حصة: يا ربي على الثقة الزايدة!
حصة ترد عليها: ما عليك منها إلا تبي الكل يشوفها مع مريم..
هيفاء: ههههههه ما أصدق!
نورة سمعت كلامهم و هي مستغربة!

مرة وحدة وقفت مريم من الرقص و طلعت برع زحمة البنات.. تخصبقت شوق لأنها كانت
ترقص مع مريم و ما توقعتها تمشي عنها في وسط الرقص!
حست شوق بالإحراج.. هيفاء و حصة قعدوا يتضحكون.. قامت شوق ترقص بجنب سمر
عشان ترقع السالفة.
نورة كانت ليلحين واقفة في مكانها إلا تحس أحد يمسك يدها و يسحبها لبرع الزحمة
مريم: تمللت بصراحة.. أمشي نطلع برع للحديقة
نورة: هااا؟! هذي حفلتك ما يصيير تتركين البنات بروحهم؟!
مريم: شوفيهم؟! تتوقعينهم يحسون أني مو موجودة!
طلعت نورة مع مريم لحديقتهم اللي ورى البيت..
كانت واسعة و جميلة.. حوض سباحة كبير و ساحة مخصصة لكرة السلة بجنبها و على
أطراف الحديقة على طول سور البيت ورود و أشجار..
نورة كانت جالسة على كرسي الحديقة تشوف مريم و هي تلعب بكرة السلة
كانت مريم تغني بصوت خفيض من دون ما تدري أن نورة تقدر تسمعها
إلتفتت على نورة و هي ساكتة
نورة: كنت أسمعك..
مريم: هههههه هذي اللي كنت أبي أعرفه.. بس راح أسكت أحسن لي


نورة: لا لا.. تخيلي أني مو موجودة

تركت مريم الكرة و جلست بجنب نورة


مريم و هي تشيير على الساحة: شوفي هالساحة.. كانت كلها حشيش أحضر و أشجار.. و
كان عليها أرجوحتين.. الأرجوحة اللي كانت على اليمين لي و اللي كانت على اليسار كانت
لأخوي راشد.. لما حبل أرجوحته إنقطع.. أنا و هو كنا نتخانق على أرجوحتي!
نورة: هههههه حلوة القصة
مريم: تتطنزين!
نورة: لا والله عجبتني السالفة خلصي..
مريم: علينا!! ههههه.. المهم من بعد ما دخلت الإبتدائي صرت مدمنة شي أسمه كرة سلة..
كنت أحن ليل و نهار على أهلي أن يحطوا لي سلة عشان ألعب. في عيد ميلادي العاشر
سافرت مع بيتنا أستراليا و لما رديت أبوي كان عامل لي مفاجئة.. كانت سفرتنا كلها خطة
عشان يحول هالمساحة لملعب خاص بكرة السلة كهدية لي.. بصراحة ما أقدر أوصف
شعوري لما شفت الملعب!


كانت نورة ساكتة و حاطة إيدها على خدها و هي تسمع مريم تتكلم
حست أن هذي أول مرة أحد يكلمها و الكلام اللي يقوله جاي من قلبه!
مريم إلتفتت على نورة: شفيك سرحانة فيني؟! لهالحد عاجبتك!
نورة مرة وحدة إستوعبت و قعدت عدل
نورة: لا بس إندمجت في السالفة
شافت نورة أن هذي الفرصة المناسبة عشان تسأل مريم السؤال اللي ماخذ بالها
نورة: مريم ممكن أسألك سؤال و تجاوبيني بصراحة؟!
مريم: سألي اللي تبينه عمري.
نورة: ليش كل هالإهتمام فيني؟!
مريم و هي ما فاهمة قصد نورة: شنو! ما فهمت قصدك!
نورة: يعني أحنا بس صار لنا ثلاثة أيام نعرف بعض و لاحظت أنك تعامليني و كأني
صديقتك من سنين!! و أنا بالنسبة لي.. قصدي بالنسبة للكل عامة".. هالشي غريب
مريم سكتت تفكر في سؤال نورة.. و قامت أنسدحت على الكرسي و سندت راسها على
رجلين نورة..
ملامح نورة تغير.. ما توقعت هالحركة!
مريم: أممممم.. وجهك هو السبب
نورة و هي تلمس وجها: وجهي! شفيه وجهي؟!!!
مريم: ههههههههه.. لا تخافين ما فيه شي.. بس جذبني
نورة: جذبك! كيف؟!
مريم: من أول ما شفتك أول شي على البالي طرا أن لازم أتعرف عليك.. بصراحة أنعجبت
فيك و حسيت أن أقدر أقول لك كل شي!
نورة: كل هذا من وجهي!
مريم: بس تدرين أنا شايفتك في مكان من قبل المدرسة!
نورة و هي مستغربة: صج!! وين؟؟!

مريم قامت و أشرت على القمر اللي في السما..
نورة قعدت تضحك و مريم تضحك معاها..
نورة: يعني هذي هي الحقيقة.. هذي سبب إعجابك و إهتمامك الزايد فيني.. لأني جميلة يعني!
مريم: يعني شتبيني أرد عليك.. "لا لأنك كريهة تلوعين الكبد!"

نورة و مريم قعدوا يتضحكون..
إلا مرة وحدة يسمعوا صوت شوق تتكلم
شوق بحمق: لا كملوا قعدتكم الحلوة ذي!!!
مريم قامت من مكانها إلا تشوف شوق واقفة جدامهم
شوق و هي تكلم نورة: و انتي شسالفتك؟! لايكون تحبينها و أنا ما أدري؟!
نورة كانت جالسة مكانها و هي ما كانت فاهمة قصد شوق..
نظرات شوق لها كانت مخيفة لأنها حست أنها راح تقتلها!
مريم: شوق والله ما صار شي!


الجزء الثامن: السبت الأسود .. شو بيستوي في هالسبت !!

ألبارت حلو أنتضر التكمله

الجزء الثامن: السبت الأسود

نورة تمت في مكانها من غير ما تتحرك
بس مريم راحت لعند شوق
مريم: شوق شفيك كنا نتكلم بس.. ما له داعي كل هالكلام
شوق: مشيتي عني جدام كل البنات من غير ما تقولين لي عشان تقعدين هالقعدة الرومنسية معاها!
مريم: تمللت من كل هالإزعاج اللي داخل! و تمللت منك انتي! تبيني أمشي وراك 24 ساعة و كأني
خادمتك مو حبيبتك!
نورة طالعت مريم و هي منصدمة! مو مصدقة أنها قالت لشوق هالشي!
شوق بحمق: شنو قصدك!! تبين تنهين اللي بينا و بسببها هي!!
مريم ما ردت عليها.. بس تمت واقفة تطالعها.. و مثل ما يقولون السكوت علامة الرضا و شوق فهمتها
شوق: حلو.. وايد حلو! أنا اللي راح أنهي كل شي مو انتي!
إلتفتت شوق على نورة و هي تطالعها بنظرات إحتقار
شوق: الله يهنيكم مع بعض.. راح تندمين على اللي سويتيه!
مشت شوق عنهم لداخل البيت و هي معصبة
نورة ما فهمت قصد شوق من هالكلام.. و كانت مو مصدقة باللي صار
كيف تنهي مريم علاقتها بشوق و هم على طول مع بعض

نورة: مريم.. كل اللي صار بسببي.. أنا آسفة.. ما كنـــ..
مريم و هي تقاطع نورة: لا لا..
سكتت نورة و بدأت تصييح.. إلتفتت مريم عليها و راحت لعندها
مريم: نورة شفيك تبجين؟!
نورة: أنا فرقت بينكم! مثل ما قالت هي.. كل هذا بسببي.. أنا جيت هنا اليوم عشان أسعدك مو عشان
أزعلك و أفرقك مع صديقتك!
مريم و القهر طالع من عينها: و من قال أنك انتي السبب.. أنا عمري ما حبيت شوق.. ربعي هم اللي
خلونا نصيير حبايب.. لأن على قالتهم "نطيح على بعض و راح نعمل حركة في المدرسة".. هم اللي
عرفوني عليها.. بس ما يعرفون شوق الحقيقية! و ما يعرفون حقيقتي أنا كمان!
نورة سكتت و رفعت راسها إلا عينها في عين مريم.. مريم سكتت و هي تشوف عين نورة و هي تدمع
و كيف الكحل سايح على خدها..
مريم من غير ما تحس قالت اللي في قلبها لنورة..
مريم: انتي أجمل من شوق.. بكثير
نورة ما عرفت كيف ترد عليها و هي وجها جدام وجه مريم بالضبط
نورة و هي تقوم من مكانها: أممم.. الساعة 10.. لازم أروح البيت.. عمتي راح تذبحني!
مريم: تبين أوصلك؟!
نورة و هي تمشي بعيد عن مريم: لا لا السايق ناطرني برع
مريم وقفت تطالع نورة و هي تمشي لباب البيت من طريق الحديقة
حست مريم أن نورة ما تقدر تعاملها مثل قبل من بعد اللي صار.. حتى هي ما تقدر تعاملها مثل قبل من
بعد اللي صار..

رجعت مريم لداخل البيت و البنات كانوا كلهم واقفين في مكانهم و هم ساكتين..
الظاهر بسبب شوق الخبر انتشر بين البنات بسرعة البرق..
مريم بكل هدوء: الحفلة خلصت..
البنات كلهم قاموا و طلعوا برع البيت و راحوا على بيوتهم بس سمر و فاطمة راحوا لعند مريم قبل ما
تركب فوق لدارها
فاطمة: شوق قالت لنا شنو صار..
مريم وقفت في مكانها و ما ردت عليها
سمر: ما كان في داعي لكل الكلام اللي قلتي لها.. جات لعندنا و هي تبكي من القهر
مريم: تبكي من الفشلة إلا.. لأني أنا اللي تخليت عنها
سمر: أنتي قاعدة تسمعين شنو قاعدة تقولينه.. أحنا قاعدين نتكلم عن شوق.. بنت 24 ساعة كنتي
معاها.. شنو صار لك أنك انقلبتي عليها مرة وحدة!
فاطمة: أنا بقولك شنو صار.. نورة.. فرت مخها و قلبتها ضد شوق.. أنا من أول ما شفتها عرفت أن
هذي خطتها!!
مريم بحمق: نورة ما لها دخل.. خلوها برع السالفة!
سمر: راح نخليك أحين.. تفكرين باللي سويتيه.. و ****لله بكرة تردين لحواسك و تردين علينا..
فاطمة و هي تهز راسها: مسكينة شوق..
سمر و فاطمة مشوا من عند مريم و خلوها واقفة في مكانها و الحزن مغطي عليها

في نفس الوقت كانت نورة تطالع برع جامة السيارة و الدمعة على خدها
لما وصلت لعند البيت مسحت دمعتها
دخلت البيت بكل هدوء و ركبت فوق لدارها
عمتها سمعت صوتها تدخل البيت و لما أفتحت باب دارها شافتها نايمة في السرير و مغطية نفسها
باللحاف.. ردت الباب و هي ما تدري أن نورة كانت تسوي روحها نايمة لأنها ما حبت تكلم عمتها في
أي شي في تلك اللحظة..
يومين الخميس و الجمعة مروا و كل اللي سوته نورة كان ثلاثة أشياء..
تفكر في سالفة مريم و شوق.. تطلع أعذار لما يتصل أبوها عشان ما تكلمه.. و ثالث شي كان أنها
إكتشفت شي جديد تعمله.. الأكل!
هذا شي ما كانت تعرف عن نفسها نورة.. هو لما تكون حزينة تاكل عشان تنسي روحها همومها..

في يوم السبت كانت الساعة 7 الصبح و نورة جالسة في المطبخ لابسة ثياب المدرسة و تاكل بيض
عاملته لنفسها..
سلوى و هي داخلة المطبخ و الصدمة على وجها: نورة!!! شنو مقعدك هالحزة و من متى تاكلين بيض!!
نورة: ما كان في شي ثاني في الثلاجة آكله..
قامت نورة و شربت كوب الحليب اللي جدامها كامل..
نورة: خلص الحليب!!
ما صدقت سلوى اللي تشوفه.. قامت و جلست بجنب نورة على طاولة الطعام
سلوى: نورة في شي مضايقك؟!
نورة انصدمت.. كيف عمتها درت أنها متضايقة و هي ما تبين لها شي
نورة: أممم.. من قال أن في شي مضايقني.. ما فيني شي.. حتى شوفي.. قاعدة آكل كل شي في البيت لأول مرة!! ههههه
سلوى: "التغير المفاجئ لعادات المراهقين هو أحد الأدلة بأنهم يعانون من شي".. أنا ما عندي أولاد
بس أعرف هالشي! الأسبوع الجاي راح تكملين ال16 سنة يعني كبرتي و أي شي يضايقك راح أفهمه
و أساعدك..
سكتت نورة و فكرت كيف تطلع روحها من السالفة
نورة: عمتي صدقيني لو كان في شي مصايقني انتي بتكونين أول وحد أقول لها..
عمتها من ثقتها الكبيرة في نورة صدقت كلام نورة.. ما كانت تدري ان نورة تكذب عليها..
سلوى: أنزين قومي بسرعة راح تتأخري عن المدرسة.. عندي مفاجأة لك بعدين..
سكتت نورة و هي مبتسمة لعمتها.. شنو هالمفاجئة!

كانت نورة في السيارة بجنب المدرسة
توها تبي تنزل إلا تشوف كروزر مريم توقف في مواقف المدرسة
فخافت تنزل و تشوفها مريم.. تمت ناطرة ليما مريم تنزل من السيارة و تدخل داخل..
بس مريم طولت ليما دخلت المدرسة و بهالسبب تأخرت نورة..
نزلت نورة من السيارة و بكل سرعة راحت تركض للصف قبل ما يخلص الطابور الصباحي إلا أن
المشرفة الإدارية شافتها و مسكتها..
المشرفة: كل يوم تأخير! هذي ثالث مرة لك! أمشي معاي على غرفتي
نورة مشت معاها على غرفتها.. دخلت و خرجت برع و في يدها إنذار أول..
نورة و هي رايحة عالصف: أففففف!
دخلت نورة الصف و عطت المعلمة عذر التأخير من عند المشرفة
مشت نورة لطاولتها و هي تسمع البنات يتهامسون
و لما جلست سمعت كلام البنات و كأنها قاعدة تشرب سم
"هذي نورة اللي فرقت من بين مريم و شوق"
"أنا شفتها تكلم مريم يوم الأربعاء في الفسحة و كمان في الهدة"
"سمعت أن مريم نامت على حضنها في بيتها!"
"و أنا سمعت أن شوق صادتها مع مريم في غرفتها!"
نورة حست بالدوار.. مرة وحدة سمعت المعلمة تقول إسمها..
المعلمة و ورقة في إيدها: نورة.. المشرفة تبيك في غرفتها
قامت نورة من مكانها و عيون البنات عليها
طلعت برع الصف و هي خايفة من اللي راح يصيير في غرفة المشرفة
فتحت نورة باب غرفة المشرفة و شافتها جالسة تكلم شخص جدامها..
المشرفة: نورة دخلي لداخل..
لما دخلت نورة الغرفة.. كانت أكبر صدمة في حياتها..
أبوها كان جالس..
نورة و هي منصدمة: أبوي!!..
أبو نورة كان جالس يطالع بنته و هو فرحان..
أبو نورة: نورة شفيك منصدمة من شوفتي..عمتك قالت لي أنها راح تخليها مفاجئة بس أنا ما صدقتها!
نورة وقفت في مكانها تطالع أبوها و هي تبلع ريجها..
أبو نورة: أنا قلت أجيك المدرسة أفضل.. لأني كنت أشك إذا انتي عندك وقت تكلميني في البيت من
كثر إتصالاتي اللي ما تردين عليها.. خذيت إذن من مشرفتك و راح ترجعي معاي لبيت عمتك لأن في
موضوع مهم حاب أكلمك فيه..
سكتت نورة و عينها تدمع.. ما كانت تقدر تطلع اللي في قلبها لأن المكان ما كان ملائم لهالشي..
أبو نورة قام من مكانه عشان يمشي هو و نورة..
أبو نورة و هو يكلم المشرفة: شكرا على كل شي.. تعبناك معانا..
المشرفة: لا والله ما سويت إلا واجبي! أصلا نورة بنتنا و نفتخر فيها..
ولا كأنها توها زافة نورة على تأخيرها و ماعطتها إنذار

مشت نورة لبرع الإدارة و وقفت متكتفة تطالع أبوها بنظرات إحتقار و عينها تدمع
أبو نورة: نورة شفيك ساكتة؟! مو فرحانة بشوفتي؟!
نورة بكل صراحة ردت على أبوها..
نورة: لا!
مشت نورة من عنده و طافت من جدام حارس المدرسة للخارج
أبوها كان لاحقها مو مصدق باللي سمعه!
الحارس و هو يصرخ على نورة: heeeeey! وين رايحة! دخلي داخل..
أبو نورة و هو يكلم الحارس: هي معاي.. أنا أبوها
الحارس: وين بطاقتك و بطاقتها عشان أشوف الدليل
أبو نورة بكل سرعة طلع بطاقته و بطاقة نورة.. كان يبي يلحق عليها
أبو نورة طلع للخارج و هو يمشي ورا نورة
أبو نورة: نورة.. نورة أحترمي أبوك و أوقفي له و كلميه
نورة بكل حمق ردت على أبوها: أنا أعرف ليش أنت هنا!! مو لازم تقولي!
أبو نورة و هو متعجب من كلامها: أنا هنا عشان أشوفك لأنك واحشتني..
نورة و هي تبجي: بس!! لا تكذب علي.. انت هنا عشان تقولي عن سالفة زواجك! أدري والله أدري!
أبو نورة من الصدمة كل اللي فكر أن يرد عليها هو: من قال لك هالكلام؟! عمتك؟!
نورة: لا.. عمتي ما قالت لي شي.. الظاهر كانت خايفة تقولي لي..
أبو نورة: و ليش تخاف تقولك؟!
نورة: لأنها تخاف أزعل و أفقد عقلي!
أبو نورة: و ليش تزعلي! نورة أنا رجل كبير و لي حقوق و راح أتزوج على سنة الله و رسوله.. ليش
تبجين و تزعلين؟!!!


 

سكتت نورة و إمسحت دموعها..
نورة: لأنك راح تستبدل أمي.. و أنا طول عمري أقول لنفسي أنك مستحيل تعمل كذا!
أبوها سكت شوي و راح لعند نورة..
أبو نورة: اللي تقولينه صح.. ولا أحد في الدنيا كلها يقدر ياخذ مكان أمك.. و لا حتى اللي راح
أتزوجها.. بس هذا ما يعني أني أقفل على روحي الدنيا و ما أتزوج لهالسبب.. نورة أنتي بنت كبيرة و
مفروض تعرفين هالشي..
نزلت نورة راسها و قعدت تفكر للحظة
أبو نورة: أنا جيت اليوم مو عشان أعايرك بزواجي.. جيت عشان آخذك معاي لمصر..
رفعت راسها نورة و هي من الصدمة مو مصدقة اللي تسمعه..
نورة بكل تعجب: ليش؟!
أبو نورة: ما تبين تردين لمصر و تعيشين معاي مثل قبل؟!
نورة ما ردت على سؤال أبوها لأنها تدري أن أبوها كان يبيها تعيش معاه و مع زوجته الجديدة على
أساس أنها أمها الثانية.. بس هي مستحيل ترضا بهالشي..
نورة: أبي أعيش هنا مع عمتي.. أنا أحبها وايد و ما أبي أتركها
أبو نورة: و أنا يا نورة! راح تتركيني!
نورة: عندك زوجتك و عيالها اللي راح يجون في المستقبل.. راح يعوضونك عني و زيادة.. عمتي
محتاجة لي أكثر منك!
مشت نورة من عند أبوها لعند باب المدرسة.. إلتفتت عليه لآخر مرة
شافته يمشي لسيارته و يمشي من عند المدرسة.
حست نورة و كأنها في حلم.. أول مرة تتخانق مع أبوها و في النهاية يمشون عن بعض من غير تفاهم
و إتفاق!

دخلت نورة المدرسة و الصيحة ليلحين في قلبها
ما عرفت وين تروح.. شافت الصالة جدامها و دخلتها..
و كأن ثاني يوم مدرسة قاعد ينعاد جدامها..
كانت مريم جالسة داخل لوحدها و لما شافت نورة تدخل قامت من مكانها لعندها
مريم: نورة.. نورة شفيك تبجين؟!!
نورة لما شافت مريم حست أنها الوحيدة اللي عندها في المدرسة كلها
قامت و حضنتها و قعدت تبجي..
مريم: نورة شفيك؟! شصاير؟!!
جلست نورة مع مريم على كرسي الصالة و قالت لها السالفة من بدايتها لنهايتها
مريم ما صدقت أن نورة كل هذا صار لها

نورة: مريم أنا من أول ما جيت على هالبلد و المصايب تتحذف علي من كل صوب و كأن أحد مدعي
علي!
مريم: نورة أنتي بس تحلي بالصبر.. كل شي بصيير أوكي.. صدقيني..
نورة: الله يسمع منك..
كانت مريم تمسح على وجه نورة و تطالعها بنظرات ما فهمتها نورة
رن الجرس فقامت نورة من مكانها..
نورة: راح أتأخر عن الحصة.. أشوفك بعدين في الفسحة ****لله
مريم: عندي تدريب كرة القدم في الفسحة..
نورة: في الهدة عجل..
مريم: عندي مباراة كرة سلة مهمة
نورة: بكرة.. المهم راح أشوفك..
مريم: لا ما أقدر أنتظر لبكرة.. تعالي لبيتنا اليوم..
نورة: ما أتوقع راح أقدر من بعد اللي صار
مريم: خلاص راح أجيك لبيتكم.. لا تقولين لي راح تطرديني!
طلعت نورة ضحكة صغيرة من بعد اللي سمعته
مريم: ضحكت البنت!! تطـــــــور!!
مشت نورة من عند مريم و هي في النهاية مرتاحة لأن عندها مريم

في الفسحة قررت نورة أنها ما راح تخرج من الصف..
كانت خايفة بأن شوق راح تشوفها و تفتح سالفة يوم الأربعاء من أول
و كانت خايفة كمان بأنها تسمع كلام ما ينطاق من بنات المدرسة
بس لما صار وقت الهدة كانت لازم تخرج برع الصف
حملت نورة أغراضها و إنتظرت لما تخف الزحمة داخل المدرسة
كانت نورة تمشي بروحها لعند الباب إلا تلمح العنود جدامها..
نورة من كثر الفرحة صرخت: العنووووووووووووووووود!
العنود ما صدقت أنها قاعدة تسمع نورة تناديها.. إلتفتت إلا تشوف نورة تركض لعندها
نورة: العنود! وينك ولا أشوفك.. أبي أكلمك.. عن الـــــ..
العنود: و أنا ما أبي أكلمك عن شي..
سكتت نورة من الصدمة و العنود مشت عنها..
نورة: العنود ليش! ما يسوى أنك تقطعين علاقتي فيك بسبب سوء تفاهم و إختلاف وجهات نظرنا!
العنود: و من قال أن هذا السبب!
نورة: شنو السبب عجل؟؟!
العنود: الكلام اللي سمعته عنك! كان المفروض ما أحذرك عن بنات مثل مريم و طختها لأنك طلعتي
وحدة منهم!
نورة و هي مستغربة: العنود أنا مو وحدة منهم.. أنا ما أحب أحد و ولا راح أحب أحد.. أنا ما أشوف
أن لهالسوالف معنى!
العنود: نورة أنتي قاعدة تكذبين على من! اللي صار في بيت مريم يوم الأربعاء المدرسة كلها تدري
عنه و ولا كلمة تقدرين تقولينها تنكر هالشي!

مشت العنود من عند نورة تاركة نورة واقفة في مكانها و هي مو مصدقة أن العنود زعلانة عليها

بسبب كلام البنات..
حست روحها في موقف صعب.. ما كانت تقدر ترافق مريم و العنود في نفس الوقت..
أو أنها تتخلى عن مريم عشان تبين للعنود أن كل اللي تقوله حقيقة
أو أن تتخلى عن العنود و تمشي مع مريم اللي الكل ماخذ فكرة مو حلوة عنهم
أو أنها ترجع مع أبوها لمصر و تصك السالفة بكبرها!
كل شي طرا على بال نورة في تلك اللحظة..

الفصل التاسع: في بيت مريم .. ليتج يانورة ما دخلتي هالبيت